________________
દહાડો માતા બની. રામદુલારીની મા તો પૈસાની આંધળી-પૂજારણ હતી. પોતાની બેટી માં બનીને બાળક પર વહાલ વરસાવવાની ઘેલછાનો ભોગ બને, તો પછી પૈસા કોણ રળે ? આ પ્રશ્નનો ઉકેલ ઘાતકી રીતે લાવવાનો એણે નિર્ણય કર્યો.
તાજી ખિલેલી કળી શો એ નવજાત બાળક રામદુલારીની માતાના આંખમાં કણાની જેમ ખૂંચી રહ્યો. એક દહાડો સીડી પરથી એ બાળકને એણે ગબડાવી દીધો. અને બાળકને બચાવવાનો ડોળ કરતી એ નીચે દોડી ગઈ. રામદુલારી પણ હાંફળી ફાંફળી થતી આવી પહોંચી. આખો મહેલ હચમચી ઉઠયો.
આ જીવલેણ મારને બાળક ક્યાંથી ખમી શકે ? નીચે પટકાતા જ એના રામ રમી ગયા ! ઘરમાં રોકકળ મચી ગઈ. રામદુલારીના કાળજામાંથી ચીસ નીકળી ગઈ. એની મા પણ છાતી કૂટવા લાગી. હસતો રમતો મહેલ એક જ પળમાં રોકકળ અને ડૂસકાઓથી કરૂણ બની ગયો.
જીવલેણ-ઘા તો એ બાળકને લાગ્યા હતા, પણ એના બદલે લોહી જાણે રામદુલારીના શરીરમાંથી વહી રહ્યું હતું. દિવસો વીત્યા, પણ આ આઘાતની અસર ઓછી ન થઈ. રામદુલારી બહાવરી બની ગઈ. એનું મગજ બહેર મારી ગયું. શૂન્યમના થઈને દિવસો ખેંચતી પોતાની પુત્રીને જોઈને એની મા ચિંતાતુર રહેવા માંડી. બાજી આખી ઉંધી વળી ગઈ હતી. દિવસોથી પાઈની પણ પેદાશ નહોતી થઈ અને થવાના આશા-ચિહ્ન પણ હવે કળાતા નહોતા. | વેદના એક એવું તત્વ છે, જે કદીક માણસને વિરાગ તરફ, તો કદીક વિલાસ તરફ લઈ જાય ! | રામદુલારીના લમણે ઝીંકાયેલી વેદના એક દહાડો એને નવી જ દિશા ચીંધી ગઈ. મનનો મેરુભાર હળવો કરવા એ દેવદર્શનને ગઈ.
- સંસ્કૃતિની રસધાર ભાગ-૫
