________________
પર્વાધિરાજ પર્યુષણનું ગૌરીશિખર તે સંવત્સરીપર્વ છે. કાળજામાંથી કટુતાકડવાશ કાઢી નાખવાનો કીમિયો એટલે ક્ષમાપના! વર્ષભર ખરેખર જેમને તે દુભવ્યા હોય અને જેમણે તને દુભવ્યા હોય તેમની સાથે ક્ષમાની આપલે કરી લેજે, માત્ર વ્યવહાર ખાતર મિચ્છામિ દુક્કડ નહિ. ક્ષમાપનામાં ભાવ અને ક્રિયાનો સમન્વય હોય તો ક્ષમા, સમતા અમૃત અને કષાયોને ઉપશાંત કરનાર રસાયન છે, તેનો ઉપયોગ કરીને આંતરશુધ્ધિ કરી લેજે.'
ઉપાશ્રયની દીવાલોમાંથી ઘૂંટાતા અવાજમાં કંઇક અલગ રણકાર સંભળાયો... તાજગીસભર.... ઉત્સાહપ્રેરક.
તું ગમે તેવું વર્તન કરે છતાંય મને આશા છે - આ ધર્મસ્થાનકમાં હજીએ વિશુધ્ધ ચારિત્ર્યપાલન કરનારા મુનિઓ વાસ કરે છે, હજીએ આત્મમસ્તીમાં જીવનારા માત્ર સ્વ પરના કલ્યાણ કરનારા સાધુસંતોનો અહીં વર્ષાવાસ થાય છે. હજી પણ શ્રાવકાચારને વળગી રહેનારા નિષ્ઠાવાન શ્રાવક - શ્રાવિકાઓ અહીં શાશ્વત સુખના માર્ગની આકાંક્ષામાં આરાધના કરે છે. તપશ્ચર્યાઓ અને જાપ આદિ અનુષ્ઠાનોનું પ્રમાણ પણ કેટલું વધી રહ્યું છે. માત્ર આત્મકલ્યાણ અર્થે સાત્વિક પ્રભુપૂજા કરનારાઓ પણ દેરાસરમાં આવે છે. ત્યારે મારી આંખો હર્ષાશ્રુથી ઉભરાઇ જાય છે. ભલે તું તેને અમીઝરણાં કહી અભિવાદન કરે. શ્રમણસંસ્કૃતિના સંવર્ધન અને રક્ષામાં જૈન નારીનું યોગદાન પણ નોંધનીય છે. હું આશાવાદી છું. બાળકો અને યુવાનો પણ આ માર્ગે વળશે. ભૌતિકવાદથી વાઝ આવી ગયેલ વિશ્વ, શાંતિ શોધવા અધ્યાત્મને શરણે આવી રહેલ છે. એકવીસમી સદીમાં અધ્યાત્મને ઊંચો આવકાર અને જિનશાસનની પ્રભાવનામાં મને શ્રદ્ધા છે. અવાજ બંધ થતા ઉપાશ્રયની દીવાલોની ભીનાશ પલકો ભીંજવી ગઇ.
= ૨૯ E
