________________
જિનવચન એ તીર્થંકર પ્રરૂપિત એટલે તીર્થકરે પ્રેરણા કરેલ વચન છે. આવી જિનવાણીનું શ્રવણ સંસારસાગર તરવા માટે નૌકા સમાન છે.
જિનવચનનું શ્રવણ આદર અને પ્રેમથી કરીએ, સાંભળતી વખતે દષ્ટિ વકતા તરફ રાખીએ, અપ્રમતભાવ-પ્રમાદ વગર બેસીને સાંભળીએ, પ્રવચન આપનાર ગુરૂદેવ પ્રત્યે આદરભાવ રાખી સાંભળીએ, સરળહૃદયથી, નિષ્કપટ ભાવે પ્રવચન સાંભળીએ,
જ્યાં ન સમજાય ત્યારે પ્રવચન પછી વિનયપૂર્વક વિષયને અનુરૂપ પ્રશ્નો પૂછીએ, જિન વચનમાં પ્રીતિ સાથે સહૃદય, સચેતસ અને સુજ્ઞ શ્રોતા બનીએ. ગૌતમ પૃચ્છા દ્વારા જિનવચનને પોતાના અંતરમાં ઝીલી અધ્યાત્મ જગતને ઉજાળનાર ગણધર ગૌતમના જીવનમાંથી પ્રેરણા લઈ જિનવાણીને ઝીલીશું તો આત્મકલ્યાણના માર્ગે જઈ શકીશું.
