________________
સાધનાના સ્તર પર, પ્રભુ ગુણસંપત્તિના દાતા કઈ રીતે છે, એ વાત પૂ. દેવચન્દ્રજી મહારાજે પરમતારક શ્રી સુવિધિનાથ પ્રભુની સ્તવનામાં બતાવી :
પ્રભુમુદ્રાને યોગ પ્રભુ-પ્રભુતા લખે હો લાલ, દ્રવ્ય તણે સાધર્મ્ડ સ્વસંપત્તિ ઓળખે હો લાલ; ઓળખતાં બહુમાન સહિત રુચિ પણ વધે હો લાલ, રુચિ અનુયાયી વીર્ય ચરણધારા સધે હો લાલ...
પ્રભુની મુદ્રાને જોતાં પ્રભુની પ્રભુતાનો ખ્યાલ આવે. પ્રભુના આત્મદ્રવ્ય જેવું જ આત્મદ્રવ્ય પોતાનું છે એવો ખ્યાલ આવતાં પોતાની પ્રભુતાનો ખ્યાલ આવે.
એ પછી પ્રભુની પ્રભુતા પર બહુમાન. બહુમાન આવે એટલે રુચિ આવે. રુચિ પ્રમાણે આત્મશક્તિ ચાલે. અને એ રીતે આત્મગુણોમાં યાત્રા શરૂ થાય.
આ મઝાનું સાધનાનું સ્તર... પ્રભુનું દર્શન કરતાં પ્રભુના ગુણોની આંશિક ઝલક પ્રાપ્ત થાય.
ગુણોની પ્રભુદત્તતાની વાત એક મઝાનો આયામ આપણી ભીતર લાવે છે. ક્રોધ હાલતાં ને ચાલતાં આવતો'તો. પ્રભુ પાસે ક્ષમા ગુણ માગ્યો. મળ્યો. હવે કો'કે એ સાધકના ક્ષમાગુણની પ્રશંસા કરી. સાધકની આંખો ભીની બનશે અને આંખોની એ ભીનાશ પ્રભુને કહેતી હશે : પ્રભુ ! તેં આપેલ ક્ષમાગુણની પ્રશંસા થઈ છે. તું એને સ્વીકારી લે.
સ્વાનુભૂતિની પગથારે ૮ ૯ ૩
