________________
પિતાનો ધંધો ખેતીનો એટલે બહેચરને ખેતી કરવાનું સૌ કહે પરંતુ બહેચરને ખેતી કરતાં સાધુ-સંતોની સેવા કરવાનું અને પુસ્તકો વાંચવાનું વધુ પ્રિય હતું. બહેચર બાળપણથી સરસ્વતી દેવીની ઉપાસના કરતો. ગોખલામાં સરસ્વતી દેવીની છબી મૂકી તેની સામે બેસી પ્રાર્થના કરતો. એમના મિત્ર ડાહ્યાભાઈ તરફથી એમને સરસ્વતીદેવીનો મંત્ર મળ્યો. મંત્રનો જાપ હંમેશાં દેવી સમક્ષ એકચિત્તે કરતો.
ડાહ્યાભાઈના સત્સંગથી અને એમના ભંડારમાંથી બહેચર પુસ્તકોના વાંચનમાં મશગૂલ બન્યો. બહેચરે ગામડાની પ્રાથમિક શાળામાં સાત ધોરણ સુધીનો અભ્યાસ કર્યો. શાળામાં સારા ગુણથી ઉત્તીર્ણ થતાં શાળાના શિક્ષકો એને આગળ અભ્યાસ કરવાની પ્રેરણા કરતા હતા. શાળાના વિદ્યાર્થીઓ પણ એને માનથી જોતા હતા.
આ સમય દરમિયાન બહેચર શ્રી રવિસાગરજી મ.સા.ના પરિચયમાં આવ્યા. ગુરુના સત્સંગથી શ્રદ્ધા વધી. વધુ શાસ્ત્રાભ્યાસ કરવાની ઇચ્છા તીવ્ર બની. તેથી શાસ્ત્રાભ્યાસ કરવા અમદાવાદની વિદ્યાશાળામાં પંદર વર્ષની ઉંમરે દાખલ થયા. આ અભ્યાસના પરિણામે દર્શન, પૂજન, સ્વાધ્યાય અને આવશ્યક ક્રિયાઓ એમના જીવનનાં અભિન્ન અંગ બન્યાં.
પૂ. રવિસાગરજી મ.સા.ની પ્રેરણાથી મહેસાણામાં શ્રી યશોવિજયજી જૈન સંસ્કૃત પાઠશાળામાં દાખલ થઈને શાસ્ત્રોનું તલસ્પર્શી અધ્યયન કર્યું. વૈરાગ્યની ભાવના હોવાથી માતા-પિતાના મૃત્યુ બાદ પૂ. સુખસાગરજી મ.સા. પાસે બહેચરે દીક્ષા આપવાની વિનંતી કરી. ગુરુદેવ શ્રી સુખસાગરજી મ.સાહેબે સંઘ અને સ્નેહીજનોની અનુમતિથી બહેચરદાસને વિ.સં. ૧૯૫૭ના માગસર સુદિ ૬ના દિવસે દીક્ષા આપી. શ્રમણ જીવનનો સ્વીકાર થતાં બહેચરમાંથી મુનિ બુદ્ધિસાગર બન્યા. | મુનિ બુદ્ધિસાગરે આત્મોન્નતિ માટે આધ્યાત્મિકક્ષેત્રે પ્રયાણ આદર્યું. આ જ બુદ્ધિસાગર આત્મસાધનાના અખૂટ બળે યોગનિષ્ઠ આચાર્ય બુદ્ધિસાગરસૂરીશ્વરજી તરીકે સમાજમાં પ્રખ્યાત થયા. અભ્યાસ માત્ર સાત ધોરણનો પરંતુ સરસ્વતી દેવીની સાધના જીવનભર ચાલુ રહી તેના પરિણામે જૈનશાસનને મળ્યા વિવિધ વિષયોના માતબર ૧૪૦ ગ્રંથો.
સૂરિશતાબ્દીનું સંભારણું 7 86
