Book Title: Pratikraman Sutra Chintanika
Author(s): Vachamyamashreeji, Rajyashsuri
Publisher: Zaverchand Pratapchand Suparshwanath Jain Sangh
View full book text
________________
શ્રી લબ્ધિ પ્રતિક્રમણ સૂત્ર ચિંતતિકા વિશિષ્ટ કથા – વાર્તા ..
ભલા સાધક ! આત્મગુણો શ્રમવગર સિદ્ધ થતાં નથી. એક દિવસની મહેનતથી મળતા નથી... અનંતવાર અંતરની અભિલાષા જાગે છે ત્યારેઆત્મગુણની પ્રાપ્તિ થાય છે. પણ ક્ષમાગુણની એક વિશિષ્ટતા છે તે સહકુટુંબ સહપરિવાર આવે છે. એક ગુણ અનંતગુણની લાંબી હારમાળા લઇને આવે છે.
ક્ષમાગુણ... સાધના માર્ગનો પ્રાથમિક ગુણ છે. સિદ્ધિનું સોપાન છે. પણ સૌથી અધિક વિશિષ્ટતા છે. ક્ષમા જ્ઞાનના અનુપમ દ્વાર ઉદ્ઘાટન કરે છે – આત્મચેતનાને જાગૃત કરે છે. આત્મચેતના જાગૃત થતાં ગુણોની લાંબી કતાર હાજર થઇ જાય છે.
૧૩
ઓ સાધક ! તને વંદન કરવાનું મન થયું. તું પણ અનંતગુણી છે. ક્ષમાનો શ્રમ કરી તું પણ તારા અનંતગુણનું ઉદ્ઘાટન કર... પણ ક્ષમાની સિદ્ધિ અને ક્ષમાનો ઢોંગ અલગ છે. કાયર પાસે ક્ષમા શોભતી નથી. નિર્બળ પાસે ક્ષમા વામણી બને છે. ક્ષમા વીરનું ભૂષણ છે.
ક્ષમા... સાચી ક્ષમા.
પ્રાણી માત્ર પ્રત્યેના પ્રેમ - સહાનુભૂતિ – આદ૨માંથી જન્મે છે. ક્ષમાળુની દૃષ્ટિ કોઇ સીમિત વ્યક્તિ -સીમિત પરિસ્થિતિ માટે નથી. વિશ્વના સમસ્ત જીવ પ્રત્યે મૈત્રી ભાવના, વિશ્વની પ્રત્યેક પરિસ્થિતિ પ્રત્યે માધ્યસ્થ ભાવ પ્રગટ થાય ત્યારે આત્મિક ક્ષમા પ્રગટ થાય છે.
મને જન્મદાતા માતા અલગ હોઇ શકે. તને જન્મદાતા માતા અલગ હોઇ શકે. પ્રત્યેક વ્યક્તિના દેહની જનેતા – અલગ-અલગ હોય. પણ પ્રત્યેક સાધકની માતા – પ્રત્યેક ધર્મની માતા – એક જ છે. ક્ષમા... ક્ષમા માતાનો પુત્ર જ ધર્મનો આરાધક - સાધક થઇ શકે છે.
