________________
“થોડી વાર પછી સંદૂક ઉઘાડતાં જ મામા અવાક રહી ગયા. બધા રૂપિયા ગાયબ હતા. આ વખતે ગલ્લામાં રૂ. ૮૩,૦૦૦ રોકડા હતા. સાધુને ખૂબ જ સારી તક મળી ગઈ અને આ કહેવાતો ઠગ સાધુ મોટી રકમ લઈ હવામાં પીગળી ગયો. મામાને અપાર દુઃખ થયું. મામાશ્રીને રૂપિયાનું દુ:ખ ન હતું. પરંતુ આવા મહાત્મા જેવા સાધુ ઠગ નીકળ્યા તેનું અપાર દુઃખ હતુ. સાધુ પ્રત્યે તેમનો વિશ્વાસ હલી ગયો હતો. આપશ્રી પધાર્યા ત્યારે હજુ ઘા તાજો જ હતો.”
મારવાડી યુવકે કહ્યું, “આપ જ બતાવો, મામાજી શું કરે? મામાજી તમને જોઈને ચુપચાપ રહી ગયા તેનું અસલી કારણ તે દુષ્ટ સાધુનું વર્તન હતું. પરંતુ આજથી ચાર દિવસ પહેલાં જ એવી ઘટના બની ગઈ કે તેનાં કડવાં ફળ આપને ભોગવવાં પડ્યાં. વસ્તુતઃ મારા મામા દેવપુરુષ છે.”
તે યુવકે જે વાત કરી તે ખૂબ જ શરમાવે તેવી હતી અને આજના સાધુઓ માટે નાલેશી ભરેલી હતી. ઠગ સાધુનું દુઃચરિત્ર સાંભળીને શ્રી જયંતમુનિને અપાર દુ:ખ થયું. આવા શેઠને જે કડવા શબ્દો કહ્યા તે બદલ પણ તેમને ઘણો પશ્ચાત્તાપ થયો. કડવા શબ્દ કહેવા બદલ તેમણે ભાણેજ સામે ક્ષમાયાચના કરી અને ખાસ સંદેશ મોકલ્યો. તેમણે કહ્યું કે “તમારા મામાને કહેજો કે જરાપણ દુઃખ ન લગાડે. તેમને એ પણ કહેજો કે જૈન સાધુઓનો વ્યવહાર ઘણો જ ઊંચો હોય છે. તેઓ કદાચ જૈન સાધુને ઓળખી શક્યા ન હોય તો તે બાબત ખુલાસો પણ કરશો.”
એ યુવકે બધો સંદેશ હૃદયગત કર્યો. એટલું જ નહીં, તેણે મુનિશ્રીની સેવા બજાવી અને દરેક રીતે સાતા ઉપજાવી. જાણે કે મામા વતી બધો બદલો વાળી દીધો હોય તેમ યુવકે સદ્યવહાર કર્યો.
આ આખી ઘટના ખૂબ જ આશ્ચર્યકારક છે. તેથી વિશેષ ધડો લેવાનો છે કે જરા પણ ઉતાવળ કર્યા વિના, આગળ-પાછળની પરિસ્થિતિનો થોડો તાગ મેળવવો જોઈએ. ભારત-નેપાળનું સીમાક્ષેત્રઃ
પૂરો વિહાર નેપાળ અને ભારતવર્ષના સીમાક્ષેત્ર ઉપર જ હતો. તેથી આછો-પાતળો ખ્યાલ આવતો હતો કે હજારો ભારતવાસીઓ નેપાળમાં વસેલા છે.
વિરાટનગરમાં ઓશવાળ જૈનોનાં લગભગ ત્રણસોથી ચારસો ઘર હતાં. જ્યારે સમસ્ત મારવાડી સમાજનાં ૨,૦૦૦ જેટલાં ઘર હતાં. ત્યાં બહુ જ મોટા પ્રમાણમાં મારવાડી સમાજનું અસ્તિત્વ છે. ત્યાં તેમના સમાજનું વિશાળ મારવાડી ભવન પણ છે.
વિરાટનગરમાં સ્થાનકવાસી જૈનોનાં પણ દસથી બાર ઘર હતાં. મોટાભાગનાં ઘર તેરાપંથી સંપ્રદાયની ભક્તિવાળાં હતાં. તે બધા આચાર્ય તુલસીજીના ભક્ત હતા. વિરાટનગરમાં સકળ જૈન સમાજે શ્રી જયંતમુનિનું ભવ્ય સ્વાગત કર્યું. તેઓ તેરાપંથીના મહાવીર ભવનમાં ઊતર્યા હતા. આ ભવનનું નિર્માણ ઘણું ભવ્ય હતું. વિરાટનગરમાં ત્રણથી ચાર દિવસ રોકાવાનો કાર્યક્રમ હતો, તેમાં એક દિવસ જાહેર પ્રવચન રાખ્યું હતું.
સાધુતાનું શિખર અને માનવતાની મહેંક 3 448
