________________
૧૧૬
શ્રી દેવચંદ્રજી કૃત ચોવીશી ભાગ ૨ ગાથાર્થ - મારા પોતાના આત્માનું પૂર્ણ આનંદમય અનંતગુણાત્મક જે સ્વરૂપ છે તે પ્રગટ કરવા માટે પરમાત્માની સેવા એ પુષ્ટાલંબન ભૂત છે. દેવોમાં ચંદ્રમા સમાન એવા જિનરાજની ભક્તિ મનમાં ધારણ કરો અને તેનાથી અવ્યાબાધ અનંત એવા અક્ષયપદને પ્રાપ્ત કરનારા થાઓ. || ૭ ||
વિવેચન - અનાદિકાળથી હું બાધકભાવે પરિણામ પામ્યો છું. મોહ દશાથી ઘેરાયેલો છું. તેથી વિભાવદશામાં જ રમ્યો છું. પરંતુ પરમજ્ઞાની, સ્વરૂપરમણી, સ્વસ્વરૂપવિશ્રામી એવા જે અરિહંત પરમાત્મા મને મળ્યા છે તેમનું સ્વરૂપ દેખતાં, તેમના સ્વરૂપનું ધ્યાન કરતાં તેમના સ્વરૂપનું ગાન કરતાં કરતાં આ આત્માનું અશુદ્ધપણું પલટાય છે.
અશુદ્ધ દશા પલટાવાથી કારકચક્ર પણ પલટાય છે. કારકચક્ર પલટાવાથી શુદ્ધસિદ્ધદશારૂપ કાર્ય તથા અનંત અનંત સ્વસ્વરૂપસંપદા મય કાર્ય પણ જ્યારે પ્રગટ થાય છે. ત્યારે ભવ્ય જીવને પોતાનું અસલ શુદ્ધ તત્ત્વ પ્રગટ કરવા રૂપ શક્તિ શ્રી અરિહંત પરમાત્માની સેવાથી આવે છે.
તે માટે હે પ્રભુજી ! મેં મારા મનમાં એવો નિર્ધાર કર્યો છે કે મારો પોતાનો જે પૂર્ણાનંદમય સંપૂર્ણ અવ્યાબાધા સુખ જે છે તે પૂણાનંદ પ્રગટ કરવાને પુષ્ટ આલંબન અર્થાત્ પ્રબળ નિમિત્તકારણ જો કોઈ હોય તો શ્રી જિનરાજ જ છે. તે કેવા છે? ભવ્ય જીવોના આધારરૂપ, મુનિજનને અતિશય વહાલા, ભાવચિંતામણિરત્નસમાન, સમ્યગ્દષ્ટિ જીવોના ધ્યેયસ્વરૂપ, ધ્યાતા મહાત્માઓને પ્રતિચ્છેદસ્વરૂપ, અનંતગુણાકર, નિર્મળ જ્ઞાનાનંદના પાત્ર, આવા જે જિનેશ્વર પરમાત્મા મને મળ્યા છે.
