Book Title: Sadguru Sange Vishwa ne Panthe
Author(s): Manorama B Khanderiya, Balwantrai N Khanderiya
Publisher: Vishwavatsalya and Santbal Award Foundation Ahmedabad
View full book text
________________
૧૧૪
નહિ તેમ બેદરકારી પણ નહિ તેવી સમતુલા સૌ સાથે વર્તવામાં ઉપલી બાબતો ઉપયોગી થશે.
(૭) તમારામાં વિવિધ અનેક શક્તિઓ છે, માત્ર એ બધાને કેન્દ્રિત કરવાનું કામ હજુ બાકી છે. બીજાઓ તમારી આસપાસમાં કામ કરનારા તરીકે અને તમારા વિચારોની અસર નીચે કામ કરનારા તરીકે રહે, એવી તમારી ઊંડી અભિલાષા જાણી શકાય છે. આવું થવા માટે શક્યતા છે ખરી, પણ વાર છે. જે મિથ્યામદ, જે ભૂમિકા સહજ છે તેનાથી પોતા વિષે અતિવધુ માની લેવાની કુટેવ અને ક્ષણે ક્ષણે વિચારોનું પલટાવાપણું મતલબ કે ચિત્તની એકાગ્રતા તથા વ્યવસ્થિતતાની ખામી તમારા માર્ગને અવરોધે છે. એક વાત એ પણ છે કે તમારા મનમાં પડેલી ગાંઠ જલ્દી છૂટતી નથી. સ્વભાવે પણ ભોળાશ પણ નથી એમ તો નથીજ. સ્ત્રી અને પુરુષ બન્ને વચ્ચે કોઈ વેળાએ બન્નેના સૂક્ષ્મ અહંકારને ટકરાવાનો સંભવ રહે છે; ચેતીને વ્યગ્રતા ટાળી ધીરે ધીરે પણ વ્યવસ્થિત ચિત્તે નમ્રતા, ધીરજ સાથે આગળ ધપશો તો તમારું તેજ સુંદર દીપી ઉઠશે.
(૮) તમારું ચિંતન ઉચ્ચ છે, પણ આચારમાં વધવાનું ઘણું બાકી છે. વિચારોને સુવ્યવસ્થિત રીતે ગ્રહણ કરી લો છો. શાસ્ત્રભાવ સારા છે. ઉદાર સહિષ્ણુ ધીર અને વીર બનો તથા બાળકોને તેવા બનાવો.
(૯) સૂક્ષ્મ અભિમાન અને હઠ દેખાય છે. ધર્મભક્તિમાં જે છીછરાપણું છે તે તજવું જોઈએ અને ઘડી ઘડીમાં મનને ઢીલું ન કરવું જોઈએ. લાગણીવશ ન થવું જોઈએ. સાચી દરેક વાતમાં રસ લેવો જોઈએ. રૂઢિગત એકાન્તિક ન થવું જોઈએ.
(૧૦) તમારામાં મૌનપણે કાર્ય કરવાની ટેવ અને સાધના પ્રત્યેની પિપાસા આકર્ષક છે. કાંઈક અચપળતા જેવું તત્ત્વ છે, તે મંદતા દૂર કરજો અને નિરંતર પ્રભુશ્રદ્ધાએ આગળ ધપજો.
(૧૧) તમારો બહુ પરિચય ન થયો પણ ઉત્સાહ અને હિંમત એકંદરે ઠીક છે. પ્રયત્ન ચાલુ રાખજો.
(૧૨) હજુ પૂર્વગ્રહોનું મૂળ ગયું નથી, પણ જશે તેમ લાગે છે. કોઈને તુરત ન દેખાય તેવી કુટેવો છે પણ તેય જશે ખરી. કારણ તપ અને સહનશીલતા તમોને સ્વાભાવિક લાગે છે. જિજ્ઞાસા પણ ઠીક છે. કોઈ કામમાં અણગમો નથી. સૌ સાથે ભળી શકાય છે. કેટલીક વાર ઉગ્રતા આવી શમી જાય છે.
-
શ્રી સદ્ગુરુ સંગે : વિશ્વને પંથે
