________________
સ્વ. પૂ.આ. શ્રી વિજય ભુવનભાનુસૂરીશ્વરજી મ.સા.ના
જીવનની પ્રેરક વાતો હજારો ગુમરાહ યુવાનોના રાહબર, ન્યાયનિપુણમતિ, વિક્રમની એકવીસમી સદીના પૂર્વાર્ધ કાળમાં શ્રી જૈનસંઘના અનન્ય ઉપકારી, વ્યાવહારિક અતિ ઉચ્ચશિક્ષણ પ્રાપ્ત કર્યું હોવા છતાં પ્રબળ વૈરાગ્ય સાથે સંયમજીવન લેનાર તથા જીવનના અંત સુધી એવા જ વૈરાગ્યને જીવી જાણનાર સ્વ. પૂ.આ. શ્રી વિજય ભુવનભાનુસૂરીશ્વરજી મ.સા.ની જન્મશતાબ્દી પ્રસંગે કોટિ કોટિ વંદનપૂર્વક એમના જીવનની કેટલીક પ્રેરક વાતો જોઈએ.
“પ્રતિક્રમણ તો ભાનુવિજયનું જ.” (આચાર્યપદવી પૂર્વે પૂજ્યશ્રીનું નામ ભાનુવિજયજી હતું.) “ચાંદની રાત હોય... ઉપાશ્રયમાં બીજા મહાત્માઓ સંથારી ગયા હોય. એવા અવસરે ઊભડક પગે બેસીને કામળી ઓઢીને કોઈ મહાત્મા, ચંદ્રપ્રકાશમાં કાંઈ લખી રહેલા જોવા મળે તો સમજવું કે એ ભાનુવિજયજી હશે.' સિદ્ધાન્ત મહોદધિ સચ્ચારિત્ર ચૂડામણિ દાદાગુરુદેવશ્રી પ્રેમસૂરીશ્વરજી મહારાજ સાહેબે પોતાના અનેક શિષ્ય-પ્રશિષ્યાદિ વ્યાખ્યાનવાચસ્પતિ હોવા છતાં આ શિષ્યને જ ૩૩-૩૩ વર્ષો સુધી પોતાની પાસે રાખી આજીવન અંતેવાસી
બનાવવાની મહાકૃપા કરી. આ બાબત શું એ નથી સૂચવતી ? કે...
પૂજ્યશ્રી ધન્યાતિધન્ય હતા.. કારણ કે જે શિષ્ય પોતાના દિલમાં ગુરુને વસાવે છે તે ધન્ય છે અને આગળ વધી જે શિષ્ય સ્વગુરુના દિલમાં વસી જાય છે તે ધન્યાતિધન્ય છે. નિર્મળ બ્રહ્મચર્યમૂર્તિ કર્મસાહિત્યનિષ્ણાત ગુરુદેવ શ્રી પ્રેમસૂરીશ્વરજી મહારાજને પ્રતીતિ હતી કે આ શિષ્યનું સંયમ નિર્મળ છે... આ શિષ્યનું વ્યાખ્યાન-નિરૂપણ શાસ્ત્રાનુસારી છે. આ શિષ્યની વિચારધારા તથા માર્ગદર્શન સ્વકેન્દ્રિત નથી, શાસનકેન્દ્રિત છે. આ શિષ્ય સાધુઓને સાચી રીતે સંયમ-સ્વાધ્યાયમાં આગળ વધારનાર છે.
