________________
હજી દરબારમાં સહુ બેઠા હતા ને સમાચાર આવ્યા કે રાજા તૈલપ મેદાનમાંથી પીછેહઠ કરી ગયો છે. એ લડવા માગતો નથી, સંધિ માગે છે. લડાઈની આફત દૂર થઈ. સામાન્ય લોકોમાં રાહત ફેલાઈ. સહુ જાણતા હતા કે લડાઈ થાય તો ચીજવસ્તુ મોંઘી થાય. જુવાન ભાઈદીકરા રણમેદાનમાં કામ આવે. અનાથ બાળકો અને વિધવાની વસ્તી વધી જાય.
આ સમાચાર ગુજરાતમાં પહોંચ્યા ત્યારે સહુ ડાહ્યા દામોદર પર વારી ગયા. કહ્યું કે ડમરો એકે હજારાં છે. એણે આ કામ એકલે હાથે કર્યું છે. સાચું જ કહ્યું છે કે એક ગુજરાતી બરાબર આખું ગુજરાત !
વાહ રે મુત્સદી ! શી લડાઈ અને શી વાત ! અહીં તો કોઈએ તૈયારી કરી નથી કે તલવાર પણ સજાવી નથી. વાત પણ કોઈ જાણતું નથી ને માળવામાં તો બધે થઈ ગયું કે ગુજરાત ચડી આવ્યું ! ગુજરાતને મનાવો. ગુજરાત માગે તે આપો. - વાહ રે ડાહ્યાડમરા ! તું એક નથી, પણ આખું ગુજરાત છે. એક ગુજરાતી એટલે આખું ગુજરાત તે આનું નામ ! એકે હજારા તે આનું નામ !
એકે હજારાં 0 2
