________________
તે તીર્થંકર પ્રભુના પવિત્ર ચારિત્રનું વર્ણન કોણ કરી શકે ? અર્થાત્ કોઈ ન કરી શકે.
(૨) ચોદ રાજલોકમાં એક ક્ષણ માટે અજવાળું થાય છે. જ્યાં હંમેશા માટે ભયંકર અંધારું હોય છે એ સાતે નરકોમાં એક ક્ષણ માટે અજવાળું થાય છે. પહેલી નરકમાં સૂર્યના પ્રકાશ જેવું અજવાળું થાય છે. બીજી નરકમાં વાદળથી ઢંકાયેલા સૂર્યના પ્રકાશ જેવું અજવાળું થાય છે. ત્રીજી નરકમાં શરદપૂર્ણિમાના ચન્દ્રના પ્રકાશ જેવું અજવાળું થાય છે. ચોથી નરકમાં વાદળથી ઢંકાયેલા ચન્દ્રના પ્રકાશ જેવું અજવાળું થાય છે. પાંચમી નરકમાં ગ્રહોના પ્રકાશ જેવું અજવાળું થાય છે. છઠી નરકમાં નક્ષત્રના પ્રકાશ જેવું અજવાળું થાય છે. સાતમી નરકમાં તારાના પ્રકાશ જેવું અજવાળું થાય છે.
(૩) ક્યારેય ન કંપે એ ઈન્દ્રોના સિંહાસનો કંપે છે અને ઈન્દ્રો પ્રભુના કલ્યાણકોની ઉજવણી કરવા પૃથ્વીતલ પર આવે છે.
સામાન્યથી આ ત્રણે બાબતો જગતમાં બનતી નથી. તીર્થકર ભગવંતોના કલ્યાણકો વખતે જ તેમના વિશિષ્ટ પુણ્યોદયથી આવું થાય છે.
મનુષ્યલોકની ગંધ ૪૦૦ થી ૫૦૦ યોજન ઉપર ઊછળે છે. વળી મનુષ્યલોકમાં મનુષ્યો જે સુખનો અનુભવ કરે છે તેના કરતા દેવલોકમાં દેવોને અનેકગણા સુખનો અનુભવ થાય છે. તેથી સામાન્યથી ઈન્દ્રો અને દેવો પૃથ્વીતલ પર આવતા નથી. પ્રભુના વિશિષ્ટ પુણ્યોદયથી ચોસઠે ઈન્દ્રો અને અગણિત દેવો-દેવીઓ પ્રભુના કલ્યાણકોના મહોત્સવો ઉજવવા પૃથ્વીતલ ઉપર આવે છે. તેમને દેવલોકના ભૌતિક સુખ કરતા પ્રભુભક્તિમાં અનેકગણા સુખની અનુભૂતિ થાય છે.
- હે ત્રિભુવનાધીશ ! જેમ દર્પણની સામે ઊભા રહેનારનું પ્રતિબિંબ દર્પણમાં પડે છે તેમ આપને હૃદયમાં ધારણ કરનારને લક્ષ્મી સન્મુખ થાય છે.
