________________
भविसयत्तकहाए
अहरई अलयराउ संचारिउ कजलु छुडु तिलउ वडारिउ । सिहि पञ्चक्खु पुरउ पजालिउ लग्गुजोग्गु सुमुहुत्तु निहालिउ। .
ता सुहपियदंसणि अणुराइय भविसयत्तकरपल्लवि लाइय । घत्ता । एक्कासणि ताए बइसारिप्पिणु किउ विणउ।
पियवयणु चवेवि असणिवेउ उप्पमिवि गउ ॥ २१ ॥ सोहहिं ताई तेत्थु वरइत्तई सरलसहावई सुंदरचित्तई। निहुअनेहनिन्भरमणमिसलई मुहमारुयपरिओसियभसलई । नवसयवत्तसमुज्जलवत्तई चंदप्पहजिणहरि संपत्तई। भामरि देविवि हूइ सणाहहो दरिसिवि पुजमहिम जिणनाहहो। चंदप्पहजिणभवणहो तिन्नई लीलई नियमंदिरि अवइन्नई।
तहिंमि संति संतिहरि करेप्पिणु विणएं कुलदेवय सुमरेप्पिणु । घत्ता । एत्तियई करेवि नियकुलमग्गअहिटियइं।
सुहपिम्मरयाई रइवावारि परिट्टियइं ॥ २२ ॥ निज्झुणि वियणि गेहि निवसंतहं कामकामु आहारु असंतहं । मयणवियारु ताम उप्पजइ अच्चुन्भडविलासरइ छज्जइ। रमहिं भोय परिवड्डियमयणई निन्भरदरमउलावियनयणई । दियहि दियहि अन्नन्नई कीलइ सुरवरवरविजाहरलीलइ। सरहसगाढालिंगणपीलई निहुअसरसपरिउवणसीलई। वरपल्लंकतूलिसुहसयणइं अवगणियसुवन्नमणिरयणइं । सरसरूवजोव्वणमयमत्तई कयनहनियरकलंकियगत्तई। उन्भडसुरयमल्लपडिमल्लई फुडियाहरई सिढिलधम्मिल्लई । थियई एम परिवासियगत्तई अमियरसोव्वमभोगासत्तई ।
ताम जाम नवनेहनिरंतर कालहो गय बारह संवच्छर । घत्ता । एत्तियए कहेवि धणवालिं सरसइ नमिय।
भविसत्तहो कन्वि संधि समाणिय पंचमि ये ॥ २३ ॥
पञ्चमः सन्धिः
१ B इथियई २ C adds इय भविसत्तकहाए पयडियधम्मत्थकाममोक्खाए बुहधणवालकयाए पंचमीफलवण्णणाए भविसयत्ततिलकपुरपवेशविवाहकल्लाणवण्णणो णाम पंचमो सन्धी परिच्छेओ सम्मत्तो॥
