________________
એક જ બાણ મૂકી તત્કાળ રાધાવેધ કર્યો. તે જોઈ કન્યા અને રાજા વગેરે સર્વે હર્ષ પામ્યા. રાજાએ કહ્યું કે-“હે વત્સ ! તારાથી જ હું પુત્રવાળો થયો છું.” એમ કહી તેણે તેને પ્રીતિથી આલિંગન કર્યું. પછી તે કન્યા રાજાએ તેને પરણાવી અનુક્રમે રાજય પણ તેને જ આપ્યું. બાવીશ કુમારોએ અભ્યાસ નહીં કરેલો હોવાથી તેઓ રાધાવેધ કરી શક્યા નહીં. હવે તેઓ રાધાવેધ કરવાનું શીખવું શરૂ કરે તો તે રાધાવેધ તેમને શીખવો દુર્લભ છે. આમ છતાં કદાચ દિવ્ય પ્રભાવથી તેઓ પણ રાધાવેધ કદાચ કરી શકે, પરંતુ પ્રાણી પ્રમાદથી ગુમાવેલો મનુષ્ય ભવ ફરીથી પામી શકે નહીં. ૭.
ચર્મ દષ્ટાંત. ૮. કોઈ ઠેકાણે હજાર યોજનના વિસ્તારવાળું એક સરોવર હતું. તેમાં અનેક જળચરો રહેતા હતા. તેના પાણી ઉપર સેવાળની જાળ પરસ્પર ગુંથાઈને એવી થઈ ગઈ હતી કે તે સરોવર જાણે ચર્મથી મઢ્યું હોય તેવું દેખાતું હતું. તેમાં કોઈ કાચબો પોતાના ઘણા પરિવાર સાથે રહેતો હતો, તે એક વાર પોતાની ગ્રીવાઃડોકને પ્રસારીને ચોતરફ ફરતો હતો, તેટલામાં દૈવયોગે પ્રબળ વાયુને કારણે તે સેવાળમાં એક નાનું છિદ્ર પડ્યું એટલે તેમાંથી તેની ગ્રીવા બહાર નીકળી. તેથી તેણે ઊંચું જોયું તો પૂર્ણિમાના ચંદ્રથી અને અસંખ્ય તારાઓથી શોભતું આકાશ દેખાયું. તે અપૂર્વ શોભા જોઈ કાચબો ઘણો આનંદ પામ્યો, અને પોતાના કુટુંબને તે શોભા દેખાડવા માટે પાછો ડૂબકી મારી સ્વજનો પાસે આવ્યો. તે તેઓને લઈ અપૂર્વ શોભા બતાવવા ચાલ્યો. અને તે મોટા સરોવરમાં ઘણા કાળ સુધી ભટક્યો. પરંતુ વાયુને જ લીધે પાછું ઢંકાઈ ગયેલું તે છિદ્ર ફરીથી તેના જોવામાં આવ્યું નહી, છતાં દૈવયોગે કદાચ તે કાચબો ફરીથી તે છિદ્રને પામે, તો પણ પ્રમાદથી હારેલા મનુષ્યભવને પ્રાણી ફરીથી પામી શકતો નથી. ૮.
યુગ દષ્ટાંત ૯. અસંખ્ય યોજનાના વિસ્તારવાળો અને સહસ્ર યોજન ઊંડો સ્વયંભૂરમણ સમુદ્ર સર્વ અસંખ્યાતા દ્વીપો અને સમુદ્રોથી છેલ્લો વલયાકારે
