________________
૧૩૭
આડત્રીસ હજાર સાધ્વીઓ, એક લાખ ને ચોસઠ હજાર શ્રાવકો અને ત્રણ લાખ ને સત્તાવીશ હજાર શ્રાવિકાઓનો પરિવાર થયો. ચોરાશી દિવસ ન્યૂન એવા સીતેર વર્ષ સુધી કેવળી પર્યાયે વિચરતા પ્રભુનો એ પ્રમાણે ચતુર્વિધ સંઘ થયો. છેવટે પ્રભુ તેત્રીશ મુનિઓ સહિત સંમેતાદ્રિ પર્વત પર જઈ, અનશન ગ્રહણ કરી, કાયોત્સર્ગે રહ્યા. એક માસનું અનશન પૂર્ણ કરી કુલ સો વર્ષનું આયુષ્ય ભોગવી તે તેત્રીશ સાધુઓ સહિત ભગવાન ભવોપગ્રાહી ચાર અઘાતી કર્મનો ક્ષય કરી મોક્ષપદ પામ્યા. તે વૃત્તાંત અવધિજ્ઞાનથી જાણી સર્વ ઇંદ્રોએ આવી ભગવાનના નિર્વાણનો મહોત્સવ કર્યો.
આ પ્રમાણે શ્રીપાર્શ્વનાથનું ચરિત્ર કહી હવે પ્રસ્તુત કહે છે – तस्स लोगप्पईवस्स, आसि सीसे महायसे । केसी कुमारसमणे, विज्जाचरणपारगे ॥२॥
અર્થ : લોકમાં પ્રદીપ સમાન તે પાર્શ્વનાથ સ્વામીને મોટા યશવાળા અને કુમાર અવસ્થામાં જ સાધુ થયેલા એવા કેશી નામના શિષ્ય હતા, તે જ્ઞાન અને ચારિત્રના પારગામી હતા.
અહીં આ કેશીકુમારને શ્રીપાર્શ્વનાથના શિષ્ય કહ્યા, તે તેમની પરંપરા થયેલા જાણવા, પરંતુ તેમના સાક્ષાત્ શિષ્ય નહીં. કેમકે તે પ્રભુના જો હસ્તદીક્ષિત શિષ્ય હોય તો શ્રી મહાવીર સ્વામીના તીર્થની પ્રવૃત્તિ થઈ ત્યાં સુધી તે હોઈ શકે નહીં. ૨.
ओहिनाणसुए बुद्धे, सीससंघसमाउले ।। गामाणुगामं रीयंते, सावत्थि नगरिमागए ॥३॥
અર્થ : અવધિજ્ઞાન અને શ્રુતજ્ઞાન વડે તત્ત્વના જાણ અર્થાત્ મતિ, શ્રુત અને અવધિજ્ઞાનવાળા તથા શિષ્યના સમૂહ વડે પરિવરેલા એવા તે કેશીકુમાર એક ગામથી બીજે ગામ વિહાર કરતા અનુક્રમે શ્રાવતિ નામની નગરીમાં આવ્યા. ૩.
