Page Text
________________
૧૨૪
સહિત પોતાના નગરમાં આવ્યો. ત્યાં અનુક્રમે ચક્ર આદિ રત્નો ઉત્પન્ન થયાં, તેનાથી છ ખંડ સાધી સુવર્ણબાહુ રાજા ચક્રવર્તી થયા અને છ ખંડનું ચિરકાળ રાજય કર્યું.
. એક વખત પોતાની પ્રિયાઓ સહિત પ્રાસાદની ઉપર ક્રીડા કરતા સુવર્ણબાહુ રાજા આકાશમાં દેવોને જતા આવતા જોઈ વિસ્મય પામ્યા. માણસો પાસેથી જગન્નાથ તીર્થકરનું આગમન સાંભળી, ત્યાં જઈ જિનેશ્વરને વંદન કરી, તેમના મુખથી મોહનો નાશ કરનારી દેશના સાંભળી. પછી ચક્રવર્તી પોતાને સ્થાને આવ્યા અને ધર્મચક્રી પણ ભવ્ય પ્રાણીઓને પ્રબોધ કરતા પૃથ્વી પર વિચરવા લાગ્યા.
એક વખત જિનેશ્વરની પાસે આવેલા દેવોને જોતા ચક્રવર્તીને વિચાર થયો કે- “આવા દેવો મેં પૂર્વે કયાંય પણ જોયા છે.” આ પ્રમાણે ઊહાપોહ કરતાં તેમને જાતિસ્મરણ જ્ઞાન ઉત્પન્ન થયું અને તેણે પોતાના પૂર્વભવો જોયા. તેથી તેમને મોક્ષરૂપી વૃક્ષના બીજ સમાન વૈરાગ્ય થયો. એટલે દીક્ષા લેવાની ઇચ્છાથી તેણે પોતાના પુત્રને રાજય પર સ્થાપન કર્યો, તેવામાં તે જ જગન્નાથ તીર્થકર વિહાર કરતાં કરતાં ત્યાં જ પધાર્યા. તેમની પાસે સુવર્ણબાહુ ચક્રીએ દીક્ષા ગ્રહણ કરી. તે અનુક્રમે ગીતાર્થ થઈ દુસ્તર તપ કરવા લાગ્યા. તેમાં જિનસેવા આદિ સ્થાનકોના સેવન વડે તેમણે તીર્થકર નામ કર્મ ઉપાર્જન કર્યું.
એક વખત વિહારના ક્રમે ક્ષીરવન નામની અટવીમાં ક્ષીરમહાગિરિ નામના પર્વત પર આરોહણ કરી સૂર્યની સન્મુખ દષ્ટિ રાખી તેઓ કાયોત્સર્ગમાં રહ્યા. તે અવસરે કુરંગકનો જીવ નરકમાંથી નીકળી તે જ વનમાં સિંહ થયો હતો, તે દૈવયોગે ભમતો ભમતો ત્યાં આવી ચડ્યો. અને તે મુનીંદ્રને જોઈ પૂર્વના વૈરને લીધે તેના પર અત્યંત ક્રોધ પામી તે રાક્ષસની જેમ તેમના તરફ દોડ્યો. તે સિંહને આવતો જોઈ મુનીશ્વરે તત્કાળ અનશન ગ્રહણ કર્યું. તેવામાં તે સિંહ મોટી ફાળ મારી મુનિના શરીર પર પડ્યો, એટલે તે મુનિ કાળધર્મ પામી દશમા દેવલોકમાં મહાપ્રભ નામના વિમાનમાં વીશ સાગરોપમના આયુષ્યવાળા દેવ થયા.
| SR No. | 022842 |
| Book Title | Vardhaman Mahavir Ane Indrabhuti Gautam |
| Original Sutra Author | N/A |
| Author | Jitendra B Shah |
| Publisher | Shrutratnakar |
| Publication Year | 2007 |
| Total Pages | 218 |
| Language | Gujarati |
| Classification | Book_Gujarati |
| File Size | 16 MB |