________________
१६३
मूलशुद्धिप्रकरणम्-द्वितीयो भागः
सो जंपइ 'पियरम्मि वि ममम्मि एयाण किं तयं जुत्तं । जं एएहिं विहियं ?' तहावि परिखिसए लोगो ॥५८॥ खिसाभएण सो वि हु गंतुं रायगिहनगरदारम्मि । दोवारियस्स पासे समस्सिओ चिट्ठए जाव ॥५९॥ ता भयवं भवमहणो समोसढो तत्थ वीरनाहजिणो । हल्लप्फलो य लोगो निग्गच्छइ वंदणट्ठाए ॥६०॥ तं पोलीय दुवारे ठविऊणं भणइ दारपालो उ । 'खायसु तुमं जहिच्छं दुवारदेवीए नेवजं ॥६॥ मोत्तूण दारदेसं अन्नत्थ कहिं पि नेय गंतव्वं' । इय तज्जिऊण एसो वच्चइ जिणवंदणनिमित्तं ॥६२॥ बहुभक्खणा उ सो वि हु अच्चंतं पीडिओ नणु तिसाए । दोवारियबीहंतो न गच्छए नीरपाणत्थं ॥६३॥ 'नीरंनीरं' ति तओ झायंतो मरिय एक्कवावीए । संजाओ मंडुक्को सालूरीगब्भमज्झम्मि ॥६४॥ गब्भाओनीहरिलं जा जाओ जोव्वणम्मि संपुण्णो । ताव य पुणो वि पत्तो तिलोगबंधू जिणो वीरो ॥६५॥ तो तस्स वंदणत्थं निवस्स वच्चंतयस्य उल्लावे । सोऊणं सो चिंतइ नणु सुयपुव्वो इमो सद्दो ॥६६।। ईहापूहाइ तओ जाइस्सरणं इमस्स उप्पण्णं । चलिओ य वंदणत्थं उप्फिडमाणो जिणिदस्स ॥६७॥ जा पत्तो रायपहे ता सेणियरायसेण्णतुरएणं । अकंतो सुमरंतो जिणवीरं पाविओ निहणं ॥६८॥ नामेण दडुरंके विमाणपवरम्मि सुरवरो जाओ ।। दट्टणं पुव्वभवं एइ दुर्य जिणसयासम्मि ॥६९॥ निसुओ य सुरिंदेणं वण्णिज्जंतो उ सेणियनरिंदो । जह सम्मत्तम्मि इमो दढचित्तो सेलराओ व्व ॥७०॥
१. ला. जिणस्स ॥
