Page Text
________________
ता पुव्वपुरिससंतइ-कमाऽऽगयं जाणवत्तवाणिज्जं । पकरेमि पुव्वधणविल-सणेण का चंगिमा मज्झ ॥ ३६४१ ॥ किं सो वि जीवइ जए, नियभुयजुयलज्जिएण दव्वेण । जो वंछियं पयच्छइ, न मग्गणाणं पइदिणं पि । ३६४२॥ विज्जाविक्कमगुणसलह-णिज्जवित्तीए जो धरइ जीयं । तस्सेव जीवियं वण्ण-णिज्जमियरस्स किं तेण ॥ ३६४३॥ उप्पज्जति विणस्संति, णेगसो के जयम्मि नो पुरिसा । जलबुब्बुय व्व परमत्थ-रहियसोहेहिं कि तेहि
॥३६४४॥ कह सो वि पसंसिज्जइ, न जस्स सप्पुरिसकित्तणाऽवसरे। चागाऽऽइगुणगणेणं, पढम चिय जायए रेहा ॥३६४५ ॥ इति चिंतिऊण तेणं, परतीरदुल्लंभभंडपडिहत्थं । पारे पारावारस्स, झत्ति पगुणीकयं पोयं
॥३६४६॥ गमणुम्मणं च तं पेच्छि-ऊण अइविरहकायरत्तेण । अच्चंतसोगविहुराए, सुंदरीए इमं भणियं
॥ ३६४७॥ हे अज्जउत्त! अहमऽवि, तुमए सह नूणमाऽऽगमिस्सामि । पेमपरायत्तमिमं, चित्तं न तरामि संठविउं ॥ ३६४८॥ इय भणिए दढतरपणय-भाववक्खित्तचित्तपसरेणं । पडिवण्णमिमं नंदेण, तयऽणु जायम्मि पत्थावे
॥३६४९॥ आरूढाइं दोण्णि वि, ताई विसिट्ठम्मि जाणवत्तम्मि। पत्ताणि य परतीरं, खेमेणाऽणाऽऽउलमणाणि
॥ ३६५०॥ विणिवट्टियं च भंडं, उवज्जिओ भूरिकणगसंभारो । पडिभंडं घेत्तूण य, इंताण समुद्दमज्झम्मि
॥ ३६५१॥ पुव्वकयकम्मपरिणति-वसेण अच्चंतपबलपवणेण । विलुलिज्जन्ती नावा, क(झ)डत्ति सयसिक्करा जाया ॥३६५२॥ अह कहवि तहाभवियव्वयाए, उवलद्धफलगखंडाणि । एक्कम्मि चेव वेला-उलम्मि लग्गाणि लहु ताणि ॥३६५३ ॥ अघडंतघडणसुघडिय-विहडणवावडविहिस्स जोगेण । जायं परोप्परं दंस-णं च गुरुविरहविहुराणं
॥३६५४॥ तो हरिसविसायवसु-च्छलन्तदढमण्णु फुण्णगलसरणी। सहस त्ति सुंदरी नंद-कंठमऽवलंबिउंदीणा ॥३६५५॥ रोविउमाऽऽरद्धा निवि-रामनिवडंतनयणसलिलभरा । जलनिहिसंगुवलग्गंऽबु-बिंदुनिवहं मुयंति व्व
॥३६५६॥ कह कहवि धीरिमं धा-रिऊण नंदेण जंपियं ताहे। सुयणु किमेवं सोगं, करेसि अच्चंतकसिणमुही
॥३६५७॥ को नाम मयच्छि! जए, जाओ सो जस्स नेव वसणाणि । पाउब्भूयाणि न वा, जायाणि य जम्ममरणाणि ॥३६५८ ॥ कमलमुहि! पेच्छ गयणं-गणेक्कचूडामणिस्स वि रविस्स । उदय-पयाव-विणासा, पइदिवसं चिय वियंभंति किं वा न सुयं तुमए, जिणिंदवयणम्मि जं सुरेंदा वि । पुव्वसुकयक्खयम्मि, दुत्थाऽवत्थं उवलभंति
॥३६६०॥ कम्मवसवत्तिजंतूण, सुयणु ! कि एत्तिए वि परितावो। जेसिं छाय व्व समं, भमडइ दुक्खाण दंदोली ॥ ३६६१॥ इय एवमाऽऽइवयणेहि, सुंदर सासिउं वसिमहुत्तं । तीए समं चिय चलिओ, नंदो तण्हाछुहकिलंतो
॥३६६२॥ अह सुंदरीए भणियं, पिययम! एत्तो परिस्समकिलन्ता। अच्चंततिसाऽभिहया, पयमऽवि न तरामि गंतुमऽहं ॥३६६३ ।। नंदेण जंपियं सुयणु, एत्थ वीसमसु तं खणं एक्कं । जेणाऽहं तुज्झ कए, सलिलं कत्तो वि आणेमि
॥ ३६६४॥ पडिसुयमऽणाए ताहे, नंदो आसण्णकाणणुद्देसे। सलिलाऽवलोयणत्थं, तं मोत्तूणं गतो सहसा
॥ ३६६५ ॥ दिट्ठो य कयंतेण व, विभिउब्भडमुहेण सीहेण । तिव्वछुहाऽभिहएणं, अइचवलललंतजीहेण
॥ ३६६६॥ तत्तो भयसंभंतो, विस्सुमरियअणसणाऽऽइकायव्वो । अट्टज्झाणोवगतो, निहओ सो असरणो तेण
॥३६६७॥ उववण्णो य तहिं चिय, वणसंडे बालमरणदोसेण । चुयसम्मत्तसुहगुणो, सो नंदो वानरत्तेण ।
॥३६६८॥ एत्तो य सुंदरीए, परिवालितीए अइगयं दिवसं । तह वि हुन जाव नंदो, समागतो ताव संखुद्धा
।। ३६६९॥ निच्छइयतविणासा, धसत्ति सा निवडिया धरणिवढे । मुच्छानिमीलियऽच्छी, मय व्व ठाऊण खणमेक्कं ॥ ३६७०॥ वणकुसुमसुरहिमारुय-मणागउवलद्धचेयणा दीणा । रोविउमाऽऽरद्धा निबिड-दुक्खपामुक्कपोक्कारा ॥३६७१ ।। हा अज्जउत्त ! हा जिणवरिंद-पयपउमपूयणाऽऽसत्त!। हा सद्धम्ममहानिहि!, कत्थ गओ? देहि पडिवयणं ॥३६७२ ॥ हा पावदइव! धणसयण-गेहनासे वि किं न तुट्टो सि । जमऽणज्ज! अज्जउत्तो वि, निहणमिण्डिं समुवणीओ ॥३६७३ ॥ हे ताय ! सुयावच्छल ! हा हा हे जणणि ! निक्कवडपेमे । दुहजलहिनिवडियं कीस, निययधूयं उवेहेह ॥३६७४ ॥ इय सुचिरं विलवित्ता, निबिडपरिस्समकिलामियसरीरा। करयलनिहित्तवयणा, सुतिक्खदुक्खं अणुहवंती ॥३६७५ ॥ तुरगपरिवाहणऽत्थं, तत्थोवगएण सिरिउरनिवेण । दिट्ठा कह वि पियंकर-नामेणं चिन्तियं च इमं
॥ ३६७६ ॥ सावभट्ठा किमिमा, तियसवहू मयणविरहिया व रई। वणदेवया व विज्जा-हराण रमणि व्व होज्ज त्ति ॥३६७७ ।। विम्हियमणेण पुट्ठा य, सुयणु ! का तं सि? किमिह आवससि? । कत्तो य आगया? कीस, वहसि संतावमेवं ति।। ३६७८ ॥
૧૦
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |