________________
प० ११ दव्वाइं० वण्णओ]
सुत्तागमे
सच्चामोसं, चउत्थं असच्चामोसं । जीवा णं भंते ! किं सच्चं भासं भासंति, मोसं भासं भासंति, सच्चामोसं भासं भासंति, असच्चामोसं भासं भासंति ? गोयमा ! जीवा सच्चं पि भासं भासंति, मोसं पि भासं भासंति, सञ्चामोसं पि भासं भासंति, असच्चामोसं पि भासं भासंति । नेरइया णं भंते ! किं सच्चं भासं भासंति जाव असच्चामोसं भासं भासंति? गोयमा! नेरइया णं सच्चं पि भासं भासंति जाव असच्चामोसं पि भासं भासंति । एवं असुरकुमारा जाव थणियकुमारा । बेइंदियतेइंदियचउरिंदिया य नो सच्च०, नो मोसं०, नो सच्चामोसं भासं भासंति, असच्चामोसं भासं भासंति। पंचिंदियतिरिक्खजोणिया णं भंते ! किं सच्चं भासं भासंति जाव असच्चामोसं भासं भासंति ? गोथमा ! पंचिंदियतिरिक्खजोणिया णो सञ्चं भासं भासंति, णो मोसं भासं भासंति, णो सच्चामोसं भासं भासंति, एगं असच्चामोसं भासं भासंति, णण्णत्थ सिक्खापुव्वर्ग उत्तरगुणलद्धिं वा पडुच्च सच्चं पि भासं भासंति, मोसं पि०, सच्चामोसं पि०, असच्चामोसं पि भासं भासंति । मणुस्सा जाव वेमाणिया एए जहा जीवा तहा भाणियव्वा ॥ ३९४ ॥ जीवे णं भंते ! जाइं दव्वाइं भासत्ताए गिण्हइ ताई किं ठियाइं गिण्हइ, अठियाइं गिण्हइ ? गोयमा ! ठियाइं गिण्हइ, नो अठियाइं गिण्हइ । जाइं भंते ! ठियाई गिण्हइ ताई किं दव्वओ गिण्हइ, खेत्तओ गिण्हइ, कालओ गिण्हइ, भावओ गिण्हइ ? गोयमा ! दव्वओ वि गिण्हइ, खेत्तओ वि०, कालओ वि०, भावओ वि गिण्हइ। जाई भंते! दव्वओ गिण्हइ ताइं किं एगपएसियाई गिण्हइ, दुपएसियाइं जाव अणंतपएसियाई गिण्हइ ? गोयमा ! नो एगपएसियाइं गिण्हइ जाव नो असंखेजपएसियाइं गिण्हइ, अणंतपएसियाई गिण्हइ । जाइं खेत्तओ गेण्हइ ताई किं एगपएसोगाढाइं गेण्हइ, दुपएसोगाढाइं गेण्हइ जाव असंखेजपएसोगाढाइं गेण्हइ ? गोयमा ! नो एगपएसोगाढाइं गेण्हइ जाव नो संखेजपएसोगाढाइं गेण्हइ, असंखेजपएसोगाढाइं गेण्हइ । जाई कालओ गेण्हइ ताई किं एगसमय ठिइयाइं गेण्हइ, दुसमयठिइयाई गेण्हइ जाव असंखेजसमयठिंइयाइं गेण्हइ ? गोयमा ! एगसमयठिइयाइं पि गेण्हइ, दुसमयठिइयाई पि गेण्हइ जाव असंखेजसमयठिइयाइं पि गेण्हइ । जाइं भावओ गेण्हइ ताई किं वण्णमंताई गेण्हइ, गंधमंताइं०, रसमंताइं०, फासमंताई गेण्हइ ? गोयमा ! वण्णमंताई पि गे० जाव फासमंताई पि गेण्हइ। जाइं भावओ वण्णमंताई गेण्हइ ताई किं एगवण्णाइं गेण्हइ जाव पंचवण्णाइं गेण्हइ ? गोयमा ! गहणदव्वाइं पडुच्च एगवण्णाई पि गेण्हइ जाव पंचवण्णाई पि गेण्हइ, सव्वग्गहणं पडुच्च णियमा पंचवण्णाइं गेण्हइ, तंजहा-कालाइं नीलाई लोहियाई हालिद्दाइं सुकिल्लाइं । जाइं वण्णओ कालाई गेण्हइ ताई किं एगगुणकालाई गेण्हइ जाव अणंतगुणकालाइं गेण्हइ ? गोयमा !
२६ सुत्ता.
