________________
१३८
सुत्तागमे
[जीवाजीवाभिगमे
एगं जोयणसहस्सं वज्जेत्ता मज्झे अडसत्तरी जोयणसयसहस्सा, एत्थ णं रयणप्पभाए पु० नेरइयाणं तीसं निरयावाससयसहस्साई भवंतित्तिमक्खाया ॥ ते णं णरगा अंतो वट्टा बाहिं चउरंसा जाव असुभा णरएसु वेयणा, एवं एएणं अभिलावेणं उवजुंजिऊण भाणियव्वं ठाणप्पयाणुसारेणं, जत्थ जं बाहलं जत्थ जत्तिया वा नरयावाससयसहस्सा जाव अहेसत्तमाए पुढवीए, अहेसत्तमाए मज्झिमं केवइए कइ अणुत्तरा महइमहालया महाणिरया पण्णत्ता एवं पुच्छियव्वं वागरेयव्वंपि तहेव छट्ठिसत्तमासु काऊ य अगणिवण्णाभा भाणियव्वा ॥ ८१ ॥ इमीसे णं भंते ! रयणप्पभाए पुढवीए गरगा किंसंठिया पण्णत्ता ? गोयमा ! दुविहा पण्णत्ता, तंजहा—आवलियपविट्ठा य आवलियबाहिरा य, तत्थ णं जे ते आवलियपविट्ठा ते तिविहा पण्णत्ता, तंजहावटा तंसा चउरंसा, तत्थ णं जे ते आवलियबाहिरा ते णाणासंठाणसंठिया पण्णत्ता, तंजहा—अयकोट्ठसंठिया पिट्ठपयणगसंठिया कंडूसंठिया लोहीसंठिया कडाहसंठिया थालीसंठिया पिहडगसंठिया किमियडसंठिया किन्नपुडगसंठिया उडवसंठिया मुरवसंठिया मुयंगसंठिया नंदिमुयंगसंठिया आलिंगयसंठिया सुघोससंठिया दद्दरयसंठिया पणवसंठिया पडहसंठिया भेरिसंठिया झल्लरीसंठिया कुतुंबगसंठिया नालिसंठिया, एवं जाव तमाए ॥ अहेसत्तमाए णं भंते ! पुढवीए णरगा किंसंठिया पण्णत्ता ? गोयमा ! दुविहा पण्णत्ता, तंजहा-बट्टे य तंसा य ॥ इमीसे णं भंते ! रयणप्पभाए पुढवीए नरगा केवइयं बाहल्लेणं पण्णत्ता ? गोयमा ! तिण्णि जोयणसहस्साई बाहल्लेणं पण्णत्ता, तंजहा–हेट्ठा घणा सहस्सं मज्झे झुसिरा सहस्सं उप्पिं संकुझ्या सहस्सं, एवं जाव अहेसत्तमाए॥इमीसे णं भंते ! रयणप्प० पु० नरगा केवइयं आयामविक्खंभेणं केवइयं परिक्खेवेणं पण्णत्ता ? गोयमा ! दुविहा पण्णत्ता, तंजहा—संखेजवित्थडा य असंखेजवित्थडा य, तत्थ णं जे ते संखेजवित्थडा ते णं संखेज्जाइं जोयणसहस्साई आयामविक्खंभेणं संखेनाइं जोयणसहस्साइं परिक्खेवेणं पण्णत्ता तत्थ णं जे ते असंखेज्जवित्थडा ते णं असंखेज्जाइं जोयणसहस्साई आयामविक्खंभेणं असंखेज्जाई जोयणसहस्साइं परिक्खेवेणं पण्णत्ता एवं जाव तमाए, अहेसत्तमाए णं भंते ! पुच्छा, गोयमा दुविहा पण्णत्ता, तंजहा—संखेजवित्थडे य असंखेजवित्थडा य, तत्थ णं जे ते संखेजवित्थडे से णं एक जोयणसयसहस्सं आयामविक्खंभेणं तिन्नि जोयणसयसहस्साइं सोलस सहस्साइं. दोन्नि य सत्तावीसे जोयणसए तिन्नि कोसे य अठ्ठावीसं च धणुसयं तेरस य अंगुलाई अद्धंगुलयं च किंचिविसेसाहिए परिक्खेवेणं पण्णत्ते, तत्थ णं जे ते असंखेजवित्थडा ते णं असंखेज्जाई जोयणसयसहस्साई आयामविक्खंभेणं असंखेजाई जाव परिक्खेवेणं पण्णत्ता ॥ ८२ ॥ इमीसे णं भंते ! रयण
