________________
१५८
भवभावना
इय एक्को च्चिय अप्पा, जाणिज्जसु सासओ तिहुयणे वि। थक्कंति महुनिवस्स व, जणकोडीओ विसेसाओ॥६९॥ अन्नं इमं कुटुंब, अन्ना लच्छी सरीरमवि अन्नं। मोत्तुं जिणिंदधम्मं, न भवंतरगामिओ अन्नो॥७०॥ विन्नाया भावाणं, जीवो देहाइयं जडं वत्थु। जीवो भवंतरगई, थक्कंति इहेव सेसाइं॥७१॥ जीवो निच्चसहावो, सेसाणि उ भंगुराणि वत्थूणि। विहवाइ बज्झहेउब्भवं च निरहेउओ जीवो॥७२॥ बंधइ कम्मं जीवो, भुंजेइ फलं तु सेसयं तु पुणो। धणसयणपरियणाई, कम्मस्स फलं च हेउं च॥७३॥ इय भिन्नसहावत्ते, का मुच्छा तुज्झ विहवसयणेसु ?। किं वावि होज्जिमेहिं, भवंतरे तुह परित्ताणं ?॥७४॥ भिन्नत्ते भावाणं, उवयारऽवयारभावसंदेहे। किं सयणेस ममत्तं ?, को य पओसो परजणम्मि ?॥७५॥ पवणो व्व गयणमग्गे, अलक्खिओ भमइ भववणे जीवो। ठाणे ठाणम्मि समज्जिऊण धणसयणसंघाए॥७६॥ जह वसिऊणं देसियकुडीए एक्काइ विविहपंथियणो। वच्चइ पभायसमए, अन्नन्नदिसासु सव्वो वि॥७७।। जह वा महल्लरुक्खे, पओससमए विहंगमकुलाइं। वसिऊण जंति सूरोदयम्मि ससमीहियदिसासु॥७८॥ अहवा गावीओ वणम्मि एगओ गोवसन्निहाणम्मि। चरिउं जह संझाए, अन्नन्नघरेसु वच्चंति॥७९॥ इय कम्मपासबद्धा, विविहट्ठाणेहिं आगया जीवा। वसिउं एगकुटुंबे, अन्नन्नगईसु वच्चंति॥८०॥ इय अन्नत्तं परिचिंतिऊण घरघरणिसयणपडिबंध। मोत्तूण नियसहाए, धणो व्व धम्मम्मि उज्जमसु॥८१॥ नारयतिरियनरामरगईहिं चउहा भवो विणिद्दिट्ठो। तत्थ य निरयगईए, सरूवमेवं विभावेज्जा॥८२॥
