________________
ક્ષણિકનો બોધ અને નિત્યનો અનુભવ
જેવી રીતે કોઈ અન્ય વ્યક્તિના ઘરમાં રહેવાથી પોતે તેના ઘરના માલિક થઈ જતા નથી. તેવી રીતે આ દેહરૂપી પરઘરમાં રહેવાથી હું દેહનો માલિક થઈ જતો નથી. શું હું મુંબઈમાં રહું છું તેથી મુંબઈનો માલિક થઈ ગયો? ત્રણ લોકમાં રહેતો હોવાથી ત્રણ લોકનો માલિક થઈ ગયો? જગતમાં રહેવાથી જગતનો માલિક થયો? નહીં, કદાપિ નહીં.
મારું અસ્તિત્વ માત્ર મારાં અસંખ્યાત પ્રદેશ પુરતું જ છે, બસ આના સિવાય મારું માલિકીપણું બીજે ક્યાંય નથી. તેથી આ સર્વ મિથ્યાત્વભાવથી છૂટવા માટે પોતાનો મનુષ્યભવ નિજાત્મા અર્થે સમર્પિત કરવો જોઈએ.
હે આત્મા! બસ હવે તુ પાછો વળી જા, બસ પોતાની જાતને એમ કહો કે હવે મારે સંસાર પરિભ્રમણ કરવું નથી, મારે બીજો અવતાર લેવો નથી, હવે મારે ચાર ગતિમા પરિભ્રમણના દુઃખ ભોગવવા નથી. મારા અનંત વૈભવને જ મારે ભોગવવો છે. એ જ મારી શ્રદ્ધાનું શ્રદ્ધેય, શાનનું જેય બને અને ધ્યાનનું ધ્યેય બને, એવી હું પ્રતિજ્ઞા કરું છું.
