________________ 44 अनंगपविट्ठसुत्ताणि . सिद्धाणोगाहणा भणिया // 4 // तिणि सया तेत्तीसा धणुत्तिभागो य होइ बोद्धव्वा / एसा खलु सिद्धाणं, उक्कोसोगाहणा भणिया // 5 // चत्तारि य रयणीओ रयणित्तिभागूणिया य बोद्धव्वा / एसा खलु सिद्धाणं मज्झिमओगाहणा भणिया // 6 // एक्का य होइ रयणी साहीया अंगुलाई अह भवे / एसा खलु सिद्धाणं जहण्णओगाहणा भणिया // 7 // ओगाहणाएँ सिद्धा भवत्तिभागेण होइ परिहीणा / संठाणमणित्थथं जरामरणविप्पमुक्काणं // 8 // जत्थ य एगो सिद्धो तत्थ अणंता भवक्खयविमुक्का / अण्णोण्णसमवगाढा पुट्टा सव्वे य लोगंते // 9 // फुसइ अणंते सिद्धे सव्वपएसेहिं णियमसो सिद्धा / तेवि असंखेजगुणा देसपएसेहिं जे पुट्ठा // 10 // असरीरा जीवघणा उवउत्ता दंसणे य ‘णाणे य / सागारमणागारं लक्खणमेयं तु सिद्धाणं // 11 // केवलणाणुवउत्ता जाणंति सव्वभावगुणभावे / पासंति सव्वओ खलु केवलदिट्ठीअणंताहिं // 12 // णवि अत्थि माणुसाणं तं सोक्खं णविय सव्वदेवाणं / जं सिद्धाणं सोक्खं अव्वाबाहं उवगयाणं // 13 // जं देवाणं सोवखं सव्वद्धापिंडियं अणंतगुणं / ण य पावइ मुत्तिसुहं णंताहिं वग्गवग्गूहि // 14 // सिद्धस्स सुहो रासी सव्वद्धापिंडिओ जइ हवेजा / सोऽणंतवग्गभइओ सव्वागासे ण माएजा // 15 // जह णाम कोइ मिच्छो णगरगुणे बहुविहे वियाणंतो / ण चएइ परिकहेउं उवमाएँ तहिं असंतीए // 16 // इय सिद्धाणं सोक्खं अणोवमं णत्थि तस्स ओवम्मं / किंचि विसेसेणेत्तो ओवम्ममिणं सुणह वोच्छं // 17 // जह सव्वकामगुणियं पुरिसो भोत्तूण भोयणं कोइ / तण्डाछुहाविमुक्को अच्छेज जहा अमियतित्तो // 18 // इय सव्वकालतित्ता अतुलं णिव्वाणमुवगया सिद्धा / सासयमव्वाबाहं चिट्ठति सुही सुहं पत्ता // 19 // सिद्धत्ति य बुद्धत्ति य पारगयत्ति य परंपरगयत्ति / उम्मुक्तकम्मकवया अजरा अमरा असंगा य // 20 // णिच्छिण्णसव्वदुक्खा जाइजरामरणबंधणविमुक्का / अव्वाबाहं सुक्खं अणुहोति सासयं सिद्धा // 21 // अतुलसुहसागरगया अव्वाबाहं अणोवमं पत्ता / सव्वमणागयमद्धं चिट्ठति सुही सुहं पत्ता // 22 // ओववाइयउवंगं समत्तं //
