________________ - जीवाजीवाभिगमे प०३ 173 भंते ! एवमाइक्खंति एवं भासेंति एवं पण्णवेति एवं परूवेंति-एवं खलु एगे जीवे एगेणं समएणं दो किरियाओ पकरेइ, तंजहा-सम्मत्तकिरियं च मिच्छतकिरियं च, जं समयं सम्मत्तकिरियं पकरेइ तं समयं मिच्छत्तकिरियं पकरेइ, जं समयं मिच्छत्तकिरियं पकरेइ तं समयं सम्मत्तकिरियं पकरेइ, सम्मत्तकिरियापकरणयाए मिच्छत्तकिरियं पकरेइ मिच्छ्त्तकिरियापकरणयाए सम्मत्तकिरियं पकरेइ, एवं खलु एगे जीवे एगेणं समएणं दो किरियाओ पकरेइ, तंजहा-सम्मत्तकिरियं च मिच्छत्तकिरियं च, से कहमेयं भंते ! एवं ? गोयमा ! जणं ते अण्णउत्थिया एवमाइक्खंति एवं भासंति एवं पण्णवेति एवं परूवेति एवं खलु एगे जीवे एगेणं समएणं दो किरियाओ पकरेइ, तहेव जाव सम्मत्तकिरियं च मिच्छत्तकिरियं च, जे ते एवमाहंसु तं णं मिच्छा, अहं पुण गोयमा ! एवमाइक्खामि जाव परूवेमि-एवं खलु एगे जीवे एगेणं समएणं एगं किरियं पकरेइ, तंजहा–सम्मत्तकिरियं वा मिच्छत्तकिरियं वा, जं समयं सम्मत्तकिरियं पकरेइ णो तं समयं मिच्छत्तकिरियं पकरेइ, तं चेव जं समयं मिच्छत्तकिरियं पकरेइ णो तं समयं सम्मत्तकिरियं पंकरेइ, सम्मत्तकिरियापकरणयाए णो मिच्छत्तकिरियं पकरेइ मिच्छत्तकिरियापकरणयाए णो सम्मत्तकिरियं पकरेइ, एवं खलु एगे जीवे एगेणं समएणं एगं किरियं पकरेइ,तंजहा-सम्मत्तकिरियं वा मिच्छत्तकिरियं वा।१०४। ॥बीओ तिरिक्खजोणिय उद्देसो समत्तो / मणुस्स उद्देसो से किं तं मणुस्सा ? मणुस्सा दुविहा पण्णत्ता, तंजहा-समुच्छिममणुस्सा य गब्भवतियमणुस्सा य // 105 // से किं तं समुच्छिममणुस्सा 12 एगागारा पण्णत्ता // कहि णं भंते ! संमुच्छिममणुस्सा संमुच्छंति ? गोयमा! अंतोमणुस्सखेत्ते जहा पण्णवणाए जाव सेत्तं समुच्छिममणुस्सा // 106 / / से किं तं गम्भवकंतियमणुस्सा ! 2 तिविहा पण्णत्ता, तंजहा—कम्मभूमगा अकम्मभूमगा अंतरदीवगा // 107 // से किं तं अंतरदीवगा 12 अट्ठावीसइविहा पण्णत्ता, तंजहा-एगूरुया आभासिया वेसाणिया णंगोलिया हयकण्णा 4 आयंसमुहा 4 आसमुहा 4 आसकण्णा 4 उक्कामुहा 4 घणदंता जाव सुद्धदंता // 108 // कहि णं भंते ! दाहिणिल्लाणं एगोरुयमणुस्साणं एगोरुयदीवे णामं दीवे पण्णत्ते ? गोयमा ! जंबुद्दीवे 2 मंदरस्स पव्वयस्स दाहिगेणं चुलहिमवंतस्स वासहरपव्वयस्स उत्तरपुरथिमिल्लाओ चरिमंताओ लवण
