Page Text
________________
એની પાસે ગયા. એને સમજાવ્યું કે આ દારૂ દૈત્ય જેવો છે. એ માનવને દાનવ કરી નાખે છે, માટે તું દારૂ પીવાનું છોડી દે. પેલા દારૂડિયાને તો મજાક મળી. એણે એન્ડ્રુઝની સામે જ દારૂ પીવો શરૂ કર્યો. એન્ડ્રુઝે એની સામે ઊભા રહીને પ્રભુને પ્રાર્થના કરી, “હે પ્રભુ, આ દારૂ પીનારા માનવીને માફ કરજે. એનું કલ્યાણ કરજે.”
દારૂડિયો એન્ડ્રુઝની પ્રાર્થના સાંભળીને ક્યારેક અટ્ટહાસ્ય કરતો તો ક્યારેક અપશબ્દ બોલીને મારવા ધસી જતો. એન્ડ્રુઝ તો જ્યારેજ્યારે દારૂડિયો મળે ત્યારે પ્રાર્થના કરતા અને ઈશ્વરને એનું કલ્યાણ કરવાનું કહેતા. દારૂડિયો એક દિવસ અકળાયો. એણે કહ્યું, “અલ્યા ભાઈ, ઈશ્વરની વાત છોડ. તું પાગલ થઈ ગયો લાગે છે. મારા જેવાનું તે કદી ઈશ્વર કલ્યાણ કરતા હશે ? મફતની આવી બધી માથાકૂટ છોડી દે.”
એન્ડ્રુઝે કહ્યું, “ભાઈ, તને કદાચ ઈશ્વરમાં વિશ્વાસ નહિ હોય, પણ ઈશ્વરને તો તારામાં જરૂર વિશ્વાસ છે કે દારૂને તું જરૂર તિલાંજલિ આપીશ.”
દીનબંધુ એન્ડ્રુઝના આ શબ્દોએ દારૂડિયા પર જાદુઈ અસર કરી. એના હૃદયને સ્પર્શી ગયા. એણે કહ્યું, “મને એવું હતું કે ઈશ્વરને તો મારા જેવા પ્રત્યે નફરત જ હોય, પણ તમે કહો છો કે ઈશ્વરને મારા પર વિશ્વાસ છે અને તે મારું કલ્યાણ કરવા ચાહે છે, તો આજથી દારૂ હરામ.”
98 C શ્રદ્ધાનાં સુમન
૪૯ જે એકલો ખાય, એને કૂતરો કરડે છે !
મહારાજા પ્રસેનજિત એક નવી રીતે વિચારતો રાજવી હતો. સામાન્ય પરંપરા એવી હતી કે પાટવીકુંવર હોય તે ગાદીએ બેસે. મહારાજા પ્રસેનજિતે એ પરંપરા તોડવાનો વિચાર કર્યો. એણે વિચાર્યું કે મારા એકસો પુત્રમાંથી જે સૌથી યોગ્ય હશે તેને ગાદી સોંપીશ. આ એકસો રાજકુમારોની પરીક્ષા કરવાનો એણે વિચાર કર્યો.
એણે બધા રાજકુમારોને ભોજન માટે નિમંત્રણ આપ્યું. ભોજન શરૂ કરવાની સૂચના મળતાં રાજકુમારોએ ખાવાનું શરૂ કર્યું. હજી પહેલો કોળિયો મોંમાં મૂકે તે પહેલાં ચારે બાજુથી શિકારી કૂતરાઓ ધસી આવ્યા. રાજકુમારો આનાથી ડરીને ભાગવા લાગ્યા. ભોજન ભોજનને ઠેકાણે રહ્યું. આવી પરિસ્થિતિ હોય ત્યારે બીજો વિચાર કઈ રીતે થઈ શકે ?
એકમાત્ર સૌથી નાનો રાજકુમાર શ્રેણિક નિરાંતે બેસી રહ્યો. એ ડર્યો કે ભાગ્યો નહિ. બીજે દિવસે રાજસભા ભરાઈ, અમાત્ય, રાજગુરુ, અધિકારીઓ અને નગરના પ્રતિષ્ઠિત સજ્જનો બેઠા હતા. આ સમયે રાજા પ્રસેનજિતે બધા રાજકુમારોને બોલાવ્યા. નવ્વાણું રાજકુમારોએ તો અધિકારીઓની અવ્યવસ્થા માટે આક્રોશ ઠાલવ્યો. મહારાજાએ એમને સખતમાં સખત સજા કરવી જોઈએ એવું સૂચન કર્યું.
રાજાએ પૂછ્યું, “કાલે કોઈ રાજકુમાર ભોજન કરી શક્યો ખરો ?"
શ્રદ્ધાનાં સુમન D 99
| SR No. | 034436 |
| Book Title | Shraddhana Suman |
| Original Sutra Author | N/A |
| Author | Kumarpal Desai |
| Publisher | Gurjar Sahitya Prakashan |
| Publication Year | 2016 |
| Total Pages | 82 |
| Language | Gujarati |
| Classification | Book_Gujarati |
| File Size | 2 MB |