Page Text
________________
માતાજીનું પતિદેવને સ્વપ્નફળ પૂછવું, પતિદેવ દ્વારા સ્વપ્નફળકથન અને માતાજીનું શેષરાત્રિજાગરણ
પ્રભુના માતાજી ચૌદ સ્વપ્નો જોઈને જાગી જાય છે. તેમની રોમરાજી વિકસિત થઈ જાય છે. તેમના હૈયામાં આનંદ સમાતો નથી. તેઓ પતિદેવના શયનખંડમાં જઈને તેમની સમક્ષ સ્વપ્નોનું વર્ણન કરીને તેમને સ્વપ્નોનું ફળ પૂછે છે. પતિદેવ પોતાની બુદ્ધિથી વિચારીને સ્વપ્નોનું ફળ કહે છે. તે સાંભળીને માતાજીને ખૂબ જ આનંદ થાય છે. પતિદેવની રજા લઈને તેઓ પોતાના શયનખંડમાં પાછા આવીને દેવ-ગુરુ સંબંધી ધાર્મિક કથાઓ કહીને અને સાંભળીને બાકીની રાત્રી જાગતા પસાર કરે છે, કેમકે જો માતાજી સૂઈ જાય અને ખરાબ સ્વપ્ન આવે તો પૂર્વે જોયેલા શુભ સ્વપ્નોનું ફળ હણાઈ જાય.
સૌધર્મેન્દ્ર વડે શક્રસ્તવથી સ્તવના છે પ્રભુના ચ્યવનકલ્યાણક વખતે સૌધર્મેન્દ્રનું સિંહાસન કંપે છે. તેથી સૌધર્મેન્દ્ર અવધિજ્ઞાનથી તેનું કારણ જુવે છે. અવધિજ્ઞાનથી પ્રભુનું ચ્યવન જાણીને તે પોતાના સિંહાસન પરથી ઊભો થઈ જાય છે. તે પાદપીઠ પરથી નીચે ઊતરે છે. તે પોતાની પાદુકાઓ ઉતારે છે. તે એક વસ્ત્રનો ઉત્તરાસંગ (ખેસ) કરે છે. તે હાથ જોડીને જે દિશામાં પ્રભુનું ચ્યવન થયું હોય છે તે દિશામાં સાત-આઠ ડગલા જાય છે. તે ભૂમિ પર બેસીને ડાબો પગ ઊંચો રાખે છે અને જમણો પગ ભૂમિને અડાડીને રાખે છે. તે ત્રણવાર મસ્તકને પૃથ્વીતલ પર અડાડે છે. પછી સહેજ ઊંચો થઈને તે મસ્તકે બે હાથની અંજલી કરીને નમુત્થણં' (શક્રસ્તવ) થી પ્રભુની સ્તવના કરે છે.
આ બાજુ પૃથ્વીતલ પર સવાર પડે છે એટલે પ્રભુના પિતાજી સ્વપ્નલક્ષણપાઠકોને બોલાવીને તેમની પાસેથી પ્રભુના માતાજીએ જોયેલા ચૌદ સ્વપ્નોનું ચોક્કસ ફળ જાણે છે.
પ્રભુના માતાજી સુંદર રીતે ગર્ભનું પાલન કરે છે. તેઓ ગૂઢ રીતે ગર્ભને ધારણ કરે છે. તેથી બહારથી કોઈને ખબર ન પડે કે આમને ગર્ભ રહ્યો છે.
આ રીતે પ્રભુનું ચ્યવનકલ્યાણક ઊજવાય છે.
..........
| SR No. | 032489 |
| Book Title | Kalyanak Mahima |
| Original Sutra Author | N/A |
| Author | Ratnabodhivijay |
| Publisher | Ramjibhai Veljibhai Gala |
| Publication Year | 2018 |
| Total Pages | 82 |
| Language | Gujarati |
| Classification | Book_Gujarati |
| File Size | 6 MB |