Aafatoni Aandhi Vachhe Samruddhinu Shikhar U N Mehtanu Jivan Charitra

SR No.: 032342
Original Sutra Author: N/A
Author: Kumarpal Desai
Publisher: Torrent Limited
Total Pages: 242
Language: Gujarati
Classification: Book_Gujarati
File Size: 10 MB

Page 225

ઉત્તમભાઈની પચાસમી લગ્નતિથિ હતી. એમને વીંટી આપી અને એમના પુત્રોએ કહ્યું કે મમ્મીને ગિફ્ટ આપો. ઉત્તમભાઈએ પહેલાં એની કિંમત પૂછી અને પછી હસતાં હસતાં એ વીંટી આપતાં શારદાબહેનને કહ્યું કે આટલી મોંઘી વીંટી કઈ રીતે પહેરશો ?
૧૯૯૭ની બારમી ઑક્ટોબરે શ્રી યુ. એન. મહેતા ઇન્સ્ટિટ્યૂટ ઑફ કાર્ડિયૉલોજીનો ભવ્ય સમારોહ સિવિલ હૉસ્પિટલના પ્રાંગણમાં યોજાયો. અસ્વસ્થ તબિયતે શ્રી યુ. એન. મહેતા આ પ્રસંગે ઉપસ્થિત રહ્યા હતા અને એમણે એમની મનોભાવના વ્યક્ત કરતું પ્રવચન આપ્યું હતું. આ પ્રવચન બાદ એમની તબિયત થોડી અસ્વસ્થ બની ગઈ. જે હૉસ્પિટલનું એમણે સર્જન કર્યું હતું, એમાં જ ત્રણેક દિવસ બાદ દાખલ થવાનું આવ્યું. એમને હાર્ટએટૅક આવ્યો હતો. ડૉક્ટરે એમને એક મહિના સુધી સંપૂર્ણ આરામ લેવાની તાકીદ કરી.
રોજ વહેલી સવારે સાડાઆઠ વાગ્યે ડૉ. સિંઘ ઉત્તમભાઈના સ્વાસ્થ્યની તપાસ માટે આવતા હતા. જ્યારે જ્યારે જરૂર પડી ત્યારે ડૉ. આર. કે. પટેલ દોડી આવતા હતા. સુધીરભાઈના સહાધ્યાયી ડૉ. ધીરેન મહેતા આવે ત્યારે ઉત્તમભાઈ એમની સાથે આનંદભેર વાતો કરતા હતા. આ સમયે સાંજે ‘અકલ્પ્ય’ બંગલાની આસપાસ ઉત્તમભાઈ લટાર મારતા હતા. એમના અવસાન પૂર્વે ત્રણેક મહિના અગાઉ ઉત્તમભાઈએ કહ્યું હતું કે, “હવે ક્યાં વધુ જીવવાનું છે ?”
સુધીરભાઈએ હળવાશથી કહ્યું, “૨૦૦૦ની સાલ તો આવવા દો.” ઉત્તમભાઈએ કહ્યું, “મારે ક્યાં એ વર્ષ જોવું છે ?”
ડૉક્ટર હાઉસમાં દાખલ કર્યા તે દિવસે ઉત્તમભાઈને તપાસવા માટે ડૉ. સુમન શાહને બોલાવવામાં આવ્યા. એ દિવસે સુમનભાઈએ ફી લેવાની ના પાડી. ઉત્તમભાઈએ કહ્યું, “આ તો તમને છેલ્લી ફી આપું છું. હવે ફરી ક્યાં આપવાની
છે !”
પલંગ પાસે ઊભેલાં મીનાબહેને કહ્યું, “પપ્પાજી, કેમ આવું બોલો છો ?” ઉત્તમભાઈએ કહ્યું, “તમે બધા સંપથી રહેજો.”
એ દિવસે સાડાબાર વાગ્યે તેઓ કોમામાં જતા રહ્યા. ક્યારેક થોડીક જાગૃતિ આવતી અને પાછી ચાલી જતી. નજીકમાં રહેતા ઉપાશ્રયમાંથી મહારાજસાહેબને પધારવા વિનંતી કરી. મહારાજસાહેબે માંગલિક સંભળાવ્યું.
ઉત્તમભાઈએ એમને પૂછ્યું, “સાહેબજી, હું અમેરિકા ઑપરેશન કરાવવા ગયો હતો ત્યારે હેમખેમ પાછો આવીશ તેવું આચાર્યશ્રી કૈલાસસાગરજીએ કહ્યું હતું. અત્યારે હૉસ્પિટલમાં જાઉં છું તો હેમખેમ પાછો આવીશ કે નહીં ? તમે શું કહો છો ?” મહારાજસાહેબ મૌન રહ્યા.
221