Page Text
________________
લલિતભાઈએ એમને કહ્યું કે તેઓ મુંબઈમાં રહે છે એટલે ત્યાં જ સારવાર કરાવશે. આ સમયે ઉત્તમભાઈએ આવા દર્દમાં દોડાદોડી કરવાની ના પાડી અને અમદાવાદ જ એમની ચિકિત્સાની સઘળી વ્યવસ્થા કરી આપી હતી. અંબાલાલભાઈના પુત્રો હીરાઉદ્યોગમાં કામ કરતા હતા, પણ ઉત્તમભાઈ એમને સતત કહેતા કે તમે કોઈ બીજો વ્યવસાય શોધો તો તમારે જે કંઈ જરૂર હશે તે બધી હું પૂરી પાડીશ.
ઘણા સામાજિક પ્રસંગો છાપીમાં ઊજવાતા હતા. આ સમયે “મારું સ્વાથ્ય બરાબર નથી' કે પછી ધૂળની એલર્જી છે” એવી સાચી વાત કરીનેય ઉત્તમભાઈ એ સામાજિક પ્રસંગો ટાળી શક્યા હોત. આમ કરે કે કહે તો એમના કોઈ સગાને સહેજે ખોટું પણ લાગ્યું ન હોત, પરંતુ ઉત્તમભાઈ અને શારદાબહેન બધા જ પ્રસંગોમાં હાજર રહેતાં હતાં અને કુટુંબીજનોના અંગત કામમાં પણ પૂરતો સાથ આપતાં હતાં.
સામાજિક પ્રસંગોમાં એમનો સૌજન્યપૂર્ણ વ્યવહાર જુદો તરી આવતો હતો. કોઈ પ્રસંગમાં મળે તો નિરાંતે ઊભા રાખીને વાત કરે. બીજી વ્યક્તિઓની માફક ક્યારેય ઉતાવળ ન કરે. કોઈનું સ્વાથ્ય જોવા જાય કે પછી કોઈના પ્રસંગમાં જાય તો નિરાંતે એમની સાથે કે એમની પાસે બેસતા હતા. | ઉત્તમભાઈને જેમની સાથે વ્યાવસાયિક સંબંધો હોય, તેમની સાથે વ્યવસાયમાં વિચારભેદ હોઈ શકે, પરંતુ મનભેદ રાખતા નહીં. વળી વ્યવસાયના સંબંધમાં અને એની ઘટનાઓને પોતાના અંગત સંબંધોમાં ચંચૂપાત કરવા દેતા નહીં.
શ્રી મોરખિયાએ કહ્યું કે એમને સાયન્સ કૉલેજમાં પ્રવેશ મેળવવો હતો ત્યારે ફિઝિક્સના અધ્યાપક ડૉ. ટેઇલર દ્વારા શ્રી મોરખિયાને એડમિશન મળ્યું. હકીકતમાં ઉત્તમભાઈને ડૉ. ટેઇલર સાથે સારો સંબંધ હતો. આના પરિણામે શ્રી મોરખિયા પ્રવેશ મેળવી શક્યા.
ઉત્તમભાઈ કોઈને પણ કશું કહેતાં પૂર્વે દસ વાર વિચાર કરતા હતા. વ્યવસાયમાં એમની સાથે હોય એને પણ કશું કહેવું હોય તો એને ભાગ્યે જ ઠપકો આપતા હતા. કુશળતાથી સલાહ કે સૂચન મૂકીને પોતાની વાત એને સમજાવી દેતા હતા. ક્યારેય ગુસ્સે થાય નહીં.
સામાન્ય રીતે બીમારીથી માનવી ચીડિયો બની જતો હોય છે. બીમારીથી કંટાળીને અવારનવાર અકળાઈ જતો, ધંધવાતો કે ગુસ્સો કરતો જોવા મળતો હોય છે. ઉત્તમભાઈને વારંવાર બીમારી આવતી હોવા છતાં એ સમયે એમનો સ્વભાવ સહેજે ઉગ્ર બની જતો નહીં. વર્ષો પૂર્વે જોનારને પણ ઉત્તમભાઈ એવા જ
189.
| SR No. | 032342 |
| Book Title | Aafatoni Aandhi Vachhe Samruddhinu Shikhar U N Mehtanu Jivan Charitra |
| Original Sutra Author | N/A |
| Author | Kumarpal Desai |
| Publisher | Torrent Limited |
| Publication Year | |
| Total Pages | 242 |
| Language | Gujarati |
| Classification | Book_Gujarati |
| File Size | 10 MB |