Aafatoni Aandhi Vachhe Samruddhinu Shikhar U N Mehtanu Jivan Charitra

SR No.: 032342
Original Sutra Author: N/A
Author: Kumarpal Desai
Publisher: Torrent Limited
Total Pages: 242
Language: Gujarati
Classification: Book_Gujarati
File Size: 10 MB

Page 188

આમાં મળી આવે અને એ કામ પૂરું ન થાય ત્યાં સુધી શાંતિથી બેસે નહીં.
શ્રી કે. સી. શાહ કહે છે કે એમને જે કામ કરવાનું હોય, જે સિદ્ધિ મેળવવાની હોય, એ બધાંની નોંધ ઉત્તમભાઈની ડાયરીમાંથી ટપકાવેલી મળી રહેતી હતી. સિત્તેર વર્ષે નાદુરસ્ત તબિયતે પણ કોઈ નોંધ કરવાની હોય કે ટેલિફોન નંબર લખવાનો હોય તો જાતે જ લખતા હતા. આવું કરતા જોઈને એમના સહાયક શ્રી સુરેશભાઈ શાહ એમ કહેતા, “હું ઘરનો છું. આપ મને કહો. મારી પાસે જરૂર આ કામ કરાવાય.” તેમ છતાં ઉત્તમભાઈ તો એમની રીત પ્રમાણે જાતે જ કામ કરતા હોય. એમને માથું દુ:ખે અથવા તો પગ દુ:ખતા હોય તો પણ કોઈને દબાવવાનું કહેતા નહીં. જો કોઈ કહે કે તમે થાક્યા છો, અમને માથું-પગ દબાવવા દો. તો ઉત્તમભાઈ સાફ શબ્દોમાં કહે, “મારે આવી ટેવ પાડવી નથી.”
એમને વિશે પ્રતિભાવ આપતા પાટણના ડૉ. રાજેન્દ્ર આર. શાહે કહ્યું, પુરુષાર્થનું પ્રતીક એટલે શ્રી ઉત્તમભાઈ મહેતા. તેઓ સેન્ડોઝમાં એમ.આર. તરીકે કામ કરતા હતા, ત્યારથી મારા પિતા ડૉ. રમણલાલભાઈ શાહને એમનો પરિચય હતો. સેન્ડોઝમાંથી નિવૃત્ત થયા બાદ એમણે જાતે નાના પાયે અમુક પ્રોડટ્સ બનાવવાનું શરૂ કર્યું. તેઓ સખત મહેનત, લગન અને દવાની ગુણવત્તા જાળવી ધીમે ધીમે પોતાના કામમાં આગળ વધ્યા.”
પ્રારંભના એ દિવસોની સ્મૃતિ પિતા પાસેથી કઢાવીને ડૉ. રાજેન્દ્ર શાહે કહ્યું, “શરૂઆતમાં તેઓ જાતે એમ.આર. તરીકે દરેક ગામ અને શહેરમાં પગપાળા કે સાઇકલ પર ફરતા હતા. દરેક ડૉક્ટરને એમના અનુકૂળ સમયે મળવા જઈ પોતાની પ્રોડક્ટની વ્યવસ્થિત રજૂઆત કરી તેઓ આગળ આવ્યા. આજે એ અથાગ મહેનત, લગન અને પ્રામાણિકતાનું પ્રતીક એટલે ‘ટોરેન્ટ ફાર્માસ્યુટિકલ્સ”. ”
ઉત્તમભાઈની નમ્રતા અને વ્યવહારકુશળતા વિશે ક્યાંય કોઈની પાસે બેમત જોવા ન મળે. આ નમ્રતા એ દેખાવની નમ્રતા નથી, બલકે હૃદયની સાહજિક નમ્રતા છે. ગ્રીસના મહાન તત્ત્વચિંતક સોક્રેટીસે યોગ્ય જ કહ્યું છે, “આ જગતમાં માનભેર જીવવાનો ટૂંકામાં ટૂંકો અને સૌથી વધુ ખાતરીદાયક માર્ગ આપણે જેવા દેખાવા માગતા હોઈએ, તેવા ખરેખર બનવાનો છે.” આ જગતમાં ઘણા માનવીઓ દંભનો અંચળો ઓઢીને જીવતા હોય છે. પોતે હોય તે કરતાં જુદી રીતે વર્તતા હોય છે. આવો બાહ્યાડંબર દીર્ઘકાળ સુધી ટકતો નથી.
સિસેરો કહે છે તેમ સાચી કીર્તિ જમીનમાં મૂળ નાંખે છે અને ફૂલતી-ફાલતી રહે છે, ત્યારે ખોટો દંભ તો ફૂલની પેઠે ખરી જાય છે. કોઈ ઢોંગ કાયમી બની શકે નહીં. 184