Aafatoni Aandhi Vachhe Samruddhinu Shikhar U N Mehtanu Jivan Charitra

SR No.: 032342
Original Sutra Author: N/A
Author: Kumarpal Desai
Publisher: Torrent Limited
Total Pages: 242
Language: Gujarati
Classification: Book_Gujarati
File Size: 10 MB

Page 147

સત્કર્મોનું ગુલાબ
ડાક્ટરોના ચક્રમાં ફસાયેલા માનવીની વેદના સંસારચક્રમાં ફસાયેલા માનવીથી લગીરેય ઓછી હોતી નથી !
રોગની એક પછી એક શક્યતાઓને તાગવામાં આવે. એની પાછળ પાછળ મેડિકલ ટેસ્ટની હારમાળા ચાલે. નિષ્ણાત ડૉક્ટરોની એપોઇન્ટમેન્ટ મેળવવાની દોડધામ ચાલે. વળી કોઈ બીજા ડૉક્ટરનું જદે નિદાન ફરી આવી બીજી હારમાળા સર્જી જાય ! એમાં એકાદ ખોટું નિદાન વ્યક્તિને માટે ગંભીર રોગ કરતાંય આર્થિક અને માનસિક રીતે વધુ ખતરારૂપ બનતું હોય છે.
આવા ડૉક્ટરો, જુદા જુદા ટેસ્ટ અને નિદાનના ચક્રમાંથી મુક્તિ મેળવવા ઉત્તમભાઈએ મહાબળેશ્વર ફરવા જવાનો વિચાર કર્યો. લૉસ એન્જલસ અને લંડનના સ્નેહીઓને જાણ કરી કે તેઓ હવે કોઈ સારવાર માટે ત્યાં આવવાના નથી.
ઉત્તમભાઈને ફરવાના સ્થળ તરીકે મહાબળેશ્વર ખૂબ ગમી ગયું. અમેરિકા કે યુરોપ કરતાં તે વધુ અનુકૂળ લાગ્યું. એક તો મહાબળેશ્વરની હરિયાળી એમને ખૂબ પસંદ પડતી હતી. વળી મુંબઈ અને અમદાવાદથી આ મનોરમ સ્થળ પ્રમાણમાં નજીક પણ ખરું, જેથી જરૂર પડે કે કોઈ તાત્કાલિક સારવારની આવશ્યકતા ઊભી થાય તો તરત જ મુંબઈ પહોંચી શકાય. અહીં મુંબઈ કે અમદાવાદના ગુજરાતીઓ પણ ઘણાં મળે, આથી એકલું-અટૂલું ન લાગે. કોડાઈ કેનાલ કે ઊટીમાં બહુ ઓછાં ગુજરાતીઓ નજરે પડે, જ્યારે મહાબળેશ્વરમાં તો આખું વાતાવરણ જ ગુજરાતી લાગે.
યુરોપ, લંડન કે સ્વિત્ઝર્લેન્ડમાં કોઈ મિત્ર કે સાથીનો સંગાથ મેળવવો અશક્ય નહીં, તો પણ મુશ્કેલ હોય છે, જ્યારે મહાબળેશ્વરમાં તો તમને કોઈ ને કોઈ મિત્ર જરૂર મળી જાય.
અહીં રોજ સવારે ઊઠીને ઉત્તમભાઈ છ કિલોમીટર ફરવા જતા હતા. બપોરે બજારમાં એકાદ લટાર લગાવતા. અજિતભાઈ ઝવેરી જેવા મિત્રો સાથે હોય તો પત્તાં રમતા હતા. સાંજે સરોવરના કિનારે ચારેક કિલોમીટર ફરી આવતા. વળી રસોઇયો સાથે હોવાથી ભોજનની બધી અનુકૂળતા રહેતી હતી. ઉકાળેલું પાણી પણ મળી રહે અને વિશાળ બંગલો હોવાથી રહેવાની સગવડ પણ સારી હતી. સવા મહિનો મહાબળેશ્વરમાં કેવી રીતે પસાર થઈ ગયો એનો ખુદ ઉત્તમભાઈને પણ ખ્યાલ ન રહ્યો. ઉત્તમભાઈ એમના જીવનકાળમાં યુરોપ-અમેરિકાનાં ઘણાં પર્યટન-સ્થળોએ ગયાં, પણ મહાબળેશ્વર એમનું સૌથી માનીતું બની રહ્યું.
મહાબળેશ્વરથી પાછા આવીને ઉત્તમભાઈએ બ્લડ રિપોર્ટ કરાવ્યા તો બધું નોર્મલ' આવ્યું. આ સમયે ઉત્તમભાઈ સ્કેન અને એમ.આર.આઈ. બંને કરાવતા હતા. સ્કેનમાં ડાઇ નાખવી પડતી હતી, પરંતુ વિદેશના ડૉક્ટરોની એવી સલાહ હતી કે એમણે સ્કેન તો કરાવવું જ જોઈએ.
143