Aafatoni Aandhi Vachhe Samruddhinu Shikhar U N Mehtanu Jivan Charitra

SR No.: 032342
Original Sutra Author: N/A
Author: Kumarpal Desai
Publisher: Torrent Limited
Total Pages: 242
Language: Gujarati
Classification: Book_Gujarati
File Size: 10 MB

Page 126

ઉત્તમભાઈ જવાના હતા તે અગાઉ ડૉ. મણિભાઈ મહેતા ભારતમાં આવવાના હતા એટલે ઉત્તમભાઈએ એમને કહ્યું, “તમારે અમદાવાદમાં મારા ઘરે ઉતારો રાખવાનો છે. અહીંથી જ બધે ફરવાનું રાખજો, જેથી એકબીજાનો પરિચય કેળવી શકાય.”
ડૉ. મણિભાઈ મહેતા અમદાવાદ આવીને ઉત્તમભાઈને ત્યાં મહેમાન બન્યા. એમને ત્યાં રહેવાનું રાખ્યું અને અમદાવાદથી જુદાં જુદાં શહેરોમાં ફરવાનું ગોઠવ્યું. દરમિયાન એમના ભાઈ ડૉ. હીરાભાઈ મહેતાની દીકરીનો એક સામાજિક પ્રસંગ અમદાવાદમાં હતો, તે પણ ઉત્તમભાઈએ ઉકેલી આપ્યો. આમ જે લ્યુકસ અને રામાપાર્ટના શહેરમાં એમને જવાનું હતું, તે જ શહેરના ડૉ. મણિભાઈ મહેતા અને એમનાં પત્ની સવિતાબહેન એમને મળ્યાં.
ઉત્તમભાઈને લિમ્ફોમા થયો હતો. આ સમયે ડૉ. રાવળ એમને મળવા આવ્યા. ઉત્તમભાઈએ કહ્યું કે હવે લાંબું આયુષ્ય નથી. કેટલા દિવસનું આયુષ્ય બાકી છે એ જ જોવાનું છે. બીમારી સમયે એક ડૉક્ટર તરીકે ડૉ. રાવળને ઉત્તમભાઈની વિશેષતા એ લાગી કે તેઓ ક્યારેય બીમારીમાં સ્થિરતા ગુમાવતા નહોતા. દર્દી તરીકે સહેજે બહિર્મુખ નહિ બલકે અંતર્મુખ જ લાગે. આવી બીમારીને કારણે એમની પ્રભુશ્રદ્ધા બલવતી થતી હોય તેવું લાગતું હતું.
આયુષ્યની કોઈ અવધિ નહોતી, પરંતુ ડૉ. રાવળે કહ્યું કે તેઓ સર્જનોની કૉન્ફરન્સ યોજી રહ્યા છે અને તેમાં ઉત્તમભાઈનો સહયોગ અનિવાર્ય છે ત્યારે એમાં ઉત્તમભાઈએ હસતે મુખે સાથ આપવાની તૈયારી બતાવી. દર્દી તરીકે એમના સ્વજન શ્રી કે. સી. મહેતાને એ બાબત સૌથી આશ્ચર્યજનક લાગી કે ઉત્તમભાઈમાં અદ્ભુત સહનશક્તિ હતી. શરીરશાસ્ત્રની દૃષ્ટિએ માનવીનું જમણું મગજ કામ કરતું હોય છે અને શ્રી કે. સી. મહેતાના કહેવા પ્રમાણે ઉત્તમભાઈ પાસે એ જમણા મગજનો ઉચિત ઉપયોગ કરવાની અદ્વિતીય શક્તિ હતી.
કેન્સરમાં બોનમેરો ટેસ્ટનાં ઇંજેક્શન આપતી વખતે ગમે તેટલી હિંમતવાન વ્યક્તિ પણ ચીસ પાડી ઊઠે. જ્યારે ઉત્તમભાઈ સ્વસ્થતાથી આ પારાવાર વેદના સહન કરતા હતા. ઉત્તમભાઈની આ સહનશક્તિને પ્રમાણતાં શ્રી કે. સી. મહેતાએ કહ્યું કે આટલી સખત વેદના આપણે સહન કરી શકીએ નહીં. વળી ઉત્તમભાઈ પોતાના વિચિત્ર દર્દને પૂરેપૂરું ચકાસીને નિર્ણય લેતા હતા અને એમના આવા નિર્ણયને ફળીભૂત કરે તેવા માર્ગો પણ મળી રહેતા હતા.
અમેરિકા જતાં અગાઉ ઉત્તમભાઈ જ્યોતિષીને પોતાની કુંડળી બતાવીને પૂછતા, “મારું આયુષ્ય કેટલું છે ?”
122