________________
કોશિશ કરતો હોય તેવા માનવીની આ કથા છે.
જીવન એટલે જ ભરતી અને ઓટ. પણ આ એવી ચરિત્રકથા છે કે જેમાં ભરતી પછી ઓટ આવતી નથી, બલ્ક ઓટ પર ઓટ જ આવ્યા કરે છે. આફત પછી આનંદ આવતો નથી, કિંતુ આફતની વણથંભી પરંપરા ચાલ્યા કરે છે. એકાએક આવતી મુશ્કેલીનો અવરોધ એમને ક્ષણભર થોભાવી દેતો નથી, પરંતુ એક પછી એક મુશ્કેલીઓનો કાફલો આવતો રહે છે. બહારના કોઈ સાથ, સહાય કે સધિયારા વિના આ માનવી મુશ્કેલીઓ સામે લડે છે, પડે છે, વળી ઊભા થઈને ઝઝૂમે છે. બસ, ઝઝૂમતા જ રહે છે.
આ જીવનકથા એમને પ્રેરક બનશે કે જેઓ મુશ્કેલીઓ આગળ મહાત થઈને એની શરણાગતિ સ્વીકારી બેઠા છે.
આ જીવનકથા એમના હૃદયને જગાડશે કે જેમનું જીવન કોઈ વ્યસનનો ભોગ બનવાને કારણે હતાશ બની ગયું છે અને જેઓ મૃત્યુ આગળ મોંમાં તરણું લઈને બેઠા છે.
આ જીવનકથા એ ચોપાસ મુશ્કેલીઓથી ઘેરાતા માનવીને એની સામે ઝઝૂમવાનું બળ આપશે.
આ જીવનકથા એમનામાં ઉત્સાહ પ્રેરશે કે જેઓ કપરા સંજોગો આગળ હારીથાકીને નાસીપાસ થઈ બેસી ગયા છે.
આ જીવનકથા છે શૂન્યમાંથી સર્જન કરનાર, મુશ્કેલીઓમાંથી મહાન સિદ્ધિ મેળવનાર અને ચારે બાજુ ફેલાયેલા નિરાશાના કાળા ડિબાંગ અંધકારમાંથી જીવનસાફલ્યનો ઉજાસ મેળવનાર સ્વ. યુ. એન. મહેતાની.
વ્યક્તિ વિદાય પામે છે કિંતુ એના જીવનસંઘર્ષ સદાય સ્મરણમાં રહે છે. આજે શ્રી યુ. એન. મહેતા આપણી વચ્ચે નથી, પરંતુ એમના માનવીય સંઘર્ષોની સ્મૃતિઓ એટલી જ જીવંત છે.
એમના જીવનનાં સ્મરણોનો ગુલદસ્તો આપીએ છીએ ત્યારે એમાંથી પ્રેરણાની સુવાસ મઘમઘી રહે છે.
ચાલો, એ જીવનકિતાબનાં પૃષ્ઠો ઉખેળીએ. એમાં આંસુ અને અજંપો છે. વ્યથા અને વિષાદ છે. હતાશા અને અવગણના છે. આ સઘળાંને પાર કરી જતું એક ગજવેલ જેવું હૃદય અને પ્રગતિની દૃઢ મનોભાવના છે !
