________________
શ્રી અનંતનાથ પરમાત્માનું સ્તવન
૧૯ દ્વેષથી ભરેલા આશીર્વાદ અને શ્રાપ આપવાના ભાવો નથી. કેવળ નિતરતી વીતરાગતા જ છે. આવી રૂચિ એટલે સમ્યગ્દર્શન નામનો ગુણ મારામાં તમને જોવાથી પ્રગટ થયો.
તથા વારંવાર એકીટસે દેખવાથી મને સમજાયું છે કે આ જ આત્માની શુદ્ધ દશા છે. મારે પણ મોહને જિતને આવી વીતરાગતા જ પ્રાપ્ત કરવાની છે. તો જ આ આત્મામાં ઢંકાયેલા કેવળજ્ઞાનાદિ ગુણો પ્રગટ થશે. આવું સમ્યજ્ઞાન મને થયું છે. મારી દિશા બદલાઈ છે. આ પરમાત્માને દેખવાથી વીતરાગતા પ્રાપ્ત કરવા તરફ મારી મીટ મંડાણી છે.
તેના જ કારણે અનાદિની વળગેલી મોહભરી વૃત્તિઓ કંઈક કંઈક અંશે ઢીલી થઈ છે. વીતરાગતા તરફ પ્રયાણ ચાલું કર્યું છે તે દિશા બરાબર સિદ્ધ થાય તે રીતે આ પરમાત્માની સેવામાં હું જોડાયો છું. તેનાથી વિકારીભાવો ઢીલા થયા છે.
જ્યારથી આ વીતરાગ પરમાત્માને મેં જોયા છે જાણ્યા છે અને માણ્યા છે ત્યારથી મોહદશા નબળી પડવાના કારણે અનંત અનંત ભવોમાં ભટકવાનો રઝળવાનો જે ભય હતો તે ભય હવે નાશ પામી ગયો છે. કારણ કે સમ્યકત્વગુણ આવ્યા પછી આ જીવ થોડા જ ભવોમાં અવશ્ય મોક્ષે જાય જ છે મને આ વાતનો પાકો ભરોસો થયો હોવાથી હવે હું સંસારમાં રઝળીશ એવો ભય મને રહ્યો નથી. પરમાત્મા મળ્યા છે એટલે હું અવશ્ય કલ્યાણ પામીશ જ. બે-ચાર ભવોમાં જ મારો અવશ્ય વિસ્તાર થશે જ. સાચા જ્ઞાનીનો મને સાથ મળ્યો છે. એનો જ મને ઘણો આનંદ આનંદ છે. | ૫ ||
નામે હો પ્રભુ, નામે અભૂત રંગ, ઠવણા હો પ્રભુ, હવણા દીઠે ઉલ્લસે જી !
