________________
૧ ૩૫
શ્રી નમિનાથ પરમાત્માનું સ્તવન
ઈન્દ્રપણું, ચક્રવર્તિપણું, સુરમણિ તથા કલ્પવૃક્ષનો તથા કરોડાના ધનનો લાભ મળવો સુલભ છે પરંતુ તીર્થંકર પરમાત્માનું શાસન મળવું તેનાથી પણ ઘણું ઘણું દુષ્કર છે. | ૧ |
પરંતુ મારા પૂર્વે બાંધેલા કોઈક પુણ્યાનુબંધી પુણ્યના ઉદયથી આ આત્માને તીર્થંકરપ્રભુની સેવા પ્રાપ્ત થઈ છે તે કેવા હર્ષને કરાવનારી છે ? તો જેમ ચારે દિશાઓમાં ઘનાઘન (ગાઢ વાદળ વાળો) મેઘ આકાશમાં ચઢી આવ્યો હોય તો જેટલો આનંદ થાય. તેવી જ રીતે મન-વચન અને કાયાએ કરીને અધ્યાત્મપરિણતિ પૂર્વક શ્રી નમિનાથ પરમાત્માનો નમન-બહુમાન-ગુણાનુવાદ સાથે પરમાત્મા મળ્યાનો આનંદ આશ્ચર્યતા ઉપજાવે તેવો થયો છે તેથી આ મીલન મેઘઘટાતુલ્ય છે.
તથા ચારે બાજુ ગટાટોપ થઈને મેઘ આકાશમાં ચઢી આવે ત્યારે લોકોના મનમાંથી દુષ્કાળનો ભય ચાલ્યો જાય છે તેવી જ રીતે અહીં પણ શ્રી અરિહંત પરમાત્માની સેવા રૂપ મેઘ જ્યારે પ્રગટ થાય છે ત્યારે અનાદિ કાળથી મિથ્યાત્વદશારૂપી રૌરવ (એટલે કે ભયંકર દુકાળ) હતો તે ભવ્યજીવોના મનમાંથી દૂર થઈ ગયો છે આ જ મોટો લાભ થયો છે. મિથ્યાત્વ ગયું જ સમજો.
મેઘને વિષે જેમ મોટાં મોટાં વાદળાં હોય અને પાછાં તે વાદળાં વૃદ્ધિ પામતાં હોય છે તેવી જ રીતે પવિત્ર, અવિધિદોષ રહિત, આશાતના રહિત, પુગલના સુખની આશંસા રહિત, આવી આવી ઉત્તમ આચરણાઓ આ જીવમાં પ્રગટ થાય છે તે ઉત્તમ આચરણાઓ એ જ વાદળાનો સમૂહ અર્થાત્ અભ્રપટલ જાણવું. આમ વાદળાંનો સમૂહ (એટલે ઉત્તમ આચરણાઓ) વૃદ્ધિ પામે છે. આ રીતે રૂપી વસ્તુને રૂપીની ઉપમા ઘટે છે.
