________________ 227 પ્રકરણ-૩ પ્રશ્નોત્તરી વચન ત્રિકાલાબાધિત સત્ય છે. તેમાં શંકા ઊભી થાય એવો કોઈ અવકાશ જ નથી. જે જીવ જિનવચન દ્વારા પોતાની મતિને પરિકર્ષિત કરે છે, તેની ભ્રાન્તિઓનું નિરસન થાય છે અને તેના યોગે અભિનિવેશ પણ નાશ પામે છે. તથા નિર્મલ બોધની પ્રાપ્તિ થાય છે. - અભિનિવેશની ઉત્પત્તિમાં માન કષાયની પણ ભૂમિકા રહેલી છે. કારણ કે, માન કષાય પકડાઈ ગયેલા ખોટા આગ્રહને છોડવાની ના પાડતો હોય છે. એકવાર ખોટું ખોટા તરીકે સમજાઈ ગયા પછી પણ એને ન છોડવા દેનાર અને ખોટાને સાચા તરીકે સિદ્ધ કરવાનો આગ્રહ રખાવનાર પણ માન કષાય છે. આથી અભિનિવેશના ત્યાગ માટે માન કષાયનો ત્યાગ કરવો આવશ્યક છે. વળી, માન કષાય જિનાગમો પ્રત્યે સમર્પણભાવ પણ કેળવવા દેતો નથી. આથી અભિનિવેશનો નાશ કરવા શ્રીજિનવચનનું પરિશીલન કરવું આવશ્યક છે. તેથી જ “હિતોપદેશમાલા' ગ્રંથમાં કહ્યું છે કે___ "कह ताव जणो सुक्खी, उदग्गकुग्गहदवग्गितवियंगो / जाव न जिणवयणामय-दहमि निव्ववइ अप्पाणं // 400 // " ભાવાર્થ ઉત્કટ કદાગ્રહરૂપી દાવાનલથી તપી ગયેલા અંગવાળો માણસ, જ્યાં સુધી જિનવચનના અમૃત સરોવરમાં ડૂબકી લગાવી પોતાની જાતને શાંત કરતો નથી, ત્યાં સુધી એ સુખી ક્યાંથી હોય ? જિનવચનના અમૃતના પાન વગર અંગે અંગમાં વ્યાપેલા અભિનિવેશનો તાપ ક્યારેય ટળતો નથી. પ્રશ્ન-પ૧ શ્રીસંઘની એકતા ખાતર સિદ્ધાંતોમાં બાંધછોડ થઈ શકે નહીં ? ઉત્તર : ના, ક્યારેય ન થઈ શકે. સિદ્ધાંત-પ્રભુની આજ્ઞા મુક્યા પછી આપણી પાસે રહેશે શું ? સંસાર સાગરને તરવાનું એકમેવ સાધન છોડી દઈશું, તો પાસે રહેશે શું ?
