________________
અપવિત્ર (પાપી) અથવા પવિત્ર (પુણ્યવાન), સુખી અથવા દુઃખી એવો પણ માણસ જો પંચનમસ્કારનું ધ્યાન ધરે તો સઘળા પાપથી મૂકાઈ જાય. ૧૮
આંગળીના અગ્રભાગ વડે (ટેરવાવડે), મેરુનું ઉલ્લંઘન કરીને અને સંખ્યાની ગણત્રી કર્યા વિના જે જપ થાય છે તેનું પ્રાયઃ અલ્પ ફળ થાય છે. ૧૯
ઉત્કૃષ્ટ, મધ્યમ અને અધમ આ ત્રણ ભેદથી જપ પણ ત્રણ પ્રકારનો થાય છે. કમલબદ્ધ વિધિથી ગણવામાં આવતો જપ ઉત્કૃષ્ટ ગણાય છે અને નવકારવાળી (માળા) વડે ગણાતો જપ મધ્યમ કહેવાય. ૨૦
મૌન કર્યા વિનાનો, સંખ્યાની ગણત્રી રાખ્યા વિનાનો, ચિત્તને રોક્યા વિનાનો, સ્થાન વિનાનો અને ધ્યાન વિનાનો જપ જઘન્ય (અધમ) કહેવાય છે. ૨૧
ત્યારબાદ પોતાના પાપની વિશુદ્ધિ માટે મુનિની નિશ્રામાં જઈ અથવા પોતાના ગૃહાંગણે બુદ્ધિમાન પુરુષ પ્રતિક્રમણ (આવશ્યક) કરે. ૨૨.
રાત્રિ સંબંધિ પાપનું, દિવસસંબધિ પાપનું, પક્ષસંબંધિ પાપનું, ચાતુર્માસસંબંધિ પાપનું અને વર્ષસંબંધિ પાપનું, આ રીતે પાંચ પ્રકારે પ્રતિક્રમણ કરવાનું શ્રી જિનેશ્વરોએ કહ્યું છે. ૨૩
આવશ્યક કર્યા બાદ પોતાના કુળની ઉત્તમ મર્યાદાઓને યાદ કરી આનંદથી પુષ્ટ બનેલા અંત:કરણપૂર્વક મંગલશ્લોકો બોલે. ૨૪.
ભગવાન શ્રી મહાવીર પરમાત્મા, ગણધર શ્રીગૌતમપ્રભુ, મહામુનિ શ્રીસ્થૂલભદ્રસ્વામી પ્રમુખમુનિઓ અને જૈનધર્મ મંગલને કરનાર થાઓ. ૨૫
શ્રી ઋષભદેવાદિ સઘળા જિનેશ્વરો, ભરતાદિ સર્વ ચક્રવર્તીઓ, સર્વ વાસુદેવો અને પ્રતિવાસુદેવો મંગલને કરનારા થાઓ. ૨૬
