________________
અહીં તો શ્રી રાવણ મૃત્યુ પામ્યા તેના બીજા જ દિવસે તેમના ભાઈએ, પુત્રોએ અને પટ્ટરાણી આદિએ પણ દીક્ષા લીધી.
એ વખતે કોઈએ કાંઈ વિરોધ ઉઠાવ્યો નહિ. ‘ગઈકાલ સુધી તો કષાયથી ધમધમી રહ્યા હતા, ગઈકાલ સુધી યુદ્ધમાં અનેકોના સંહારનું પાપ કરી રહ્યા હતા તથા શ્રી રાવણ જે પરસ્ત્રીને ઉઠાવી લાવ્યા હતા તેને પાછી ન આપવી પડે અને પોતાની સ્ત્રીને લેવા આવેલો જીવતો પાછો ન જાય, આવી પ્રવૃત્તિ પણ જે ગઈકાલ સુધી કરી રહ્યા હતા, તે આજે દીક્ષા કેમ લઈ શકે ? આવો પ્રશ્ન ત્યાં કોઈએ ઉઠાવ્યો નહિ. જો કે કુંભકર્ણ, ઇન્દ્રજિત અને મેઘવાહન યુદ્ધમાં છેલ્લા થોડા સમયથી પકડાઈને બંધનમાં પડ્યા હતા, ગઈકાલ સુધી દુશ્મનાવટની અને યુદ્ધની કાષાયિક પ્રવૃત્તિમાં રક્ત હતા, એ તો ચોક્કસ છે ને ? આવા આત્માઓને એકદમ દીક્ષા અપાય ? આપનાર જ્ઞાનીને યોગ્ય લાગે તો જરૂર અપાય અહીં તો એ પુણ્યાત્માઓને દીક્ષા આપનાર કેવળજ્ઞાની છે.
દીક્ષાને આપવાનો વિધિમાર્ગ કયો છે ?
સભા : ત્યારે આપનાથી તો કોઈને એકદમ દીક્ષા ન જ
અપાય ને ?
પૂજ્યશ્રી : આવનાર સર્વથા અપરિચિત હોય, તેની ભાવનાનો ખ્યાલ ન હોય, તો વિધિમાર્ગ એ જ છે કે દીક્ષા લેવા આવેલાને દીક્ષા ન જ અપાય. પણ પ્રવ્રજ્યા માટે ઉપસ્થિત થયેલાને માટે, જ્ઞાનીની આજ્ઞા મુજબ તેની પરિણતિની પરીક્ષા પણ અવશ્ય કરવી જોઈએ. આવનારને તેનું નામઠામ વગેરે પૂછવું જોઈએ તેમજ તે દીક્ષા લેવા કયા ઇરાદાથી આવ્યો છે ? તે પણ પૂછીને જાણી લેવુ જોઈએ. ઉચ્ચ કુળાદિનો હોય અને સંસારનો છેદ કરી મોક્ષ પ્રાપ્ત કરવાના ઇરાદાથી આવેલો હોય તો તે પ્રશ્નશુદ્ધ કહેવાય છે.
ધર્મવ્યવહારની આડે આવે તે બધા પાપવ્યવહારો...૯
