________________
ન હોય દ્રોહ. ન હોય વિશ્વાસ ભંગ.
જે સત્ય વચની છે, તે વિશ્વાસભંગી ન બને. જે સત્યવચની છે, તે મિત્રદ્રોહી ન બને. મિત્રદ્રોહ એટલે આત્મદ્રોહ.
જેણે પોતાના ઉપર પૂર્ણવિશ્વાસ રાખ્યો છે, તેવા સહોદર સમા આત્મજન સમા મિત્રનો દ્રોહ,
એવું આત્મશ્ચર્ય ઈચ્છનાર સજ્જન ન કરે. એવું પાપ ન કરે. એવું દુષ્કર્મ ન કરે.
એના જેવું કોઈ પાપ નથી. એના જેવું કોઈ અધમ કર્મ નથી. બે મિત્રો. બે બંધુઓ. એકમેક પર પૂર્ણ વિશ્વાસવાળા. તનથી જુદા- મનથી એક. બંને વચ્ચે માત્ર સત્ય જ રમી રહે. અસત્ય લેશમાત્ર ન હોય.
આવા મિત્રનો દ્રોહ ન કરાય. વિશ્વાસભંગ ન કરાય. અસત્યનો આશરો ન લેવાય. પાપમાં ન પડાય. અધમતાના આશરે ન જવાય.
બંને વચ્ચે તો છે એકત્વ. બંને વચ્ચે તો છે બંધુત્વ. બંને વચ્ચે તો છે વિશ્વાસ. બંને વચ્ચે તો છે સત્ય. સત્યનો સંબંધ.
જગત સત્ય પર ટકે છે. જગત વિશ્વાસ પર ટકે છે. વિશ્વાસની દ્રઢતા એટલે મૈત્રી.
દિલ દઈ જાણે તે મિત્ર. ત્યાગ કરી જાણે તે મિત્ર. જાતે ઘસાઈને મિત્રનું ભલું ઈચ્છે તે મિત્ર. મૈત્રી સુગંધીપૂર્ણ હોય. મૈત્રી સદાય ફોર્યા કરે. આ સુગંધને દુર્ગંધમાં ન પલટાવી શકાય. ત્યાં તો માત્ર હોય સત્યની સુગંધ. મૈત્રીની મહેંક. મૈત્રીના ગુલાબ જ મહેંકતા હોય. તેનું નામ મૈત્રી. તેનું નામ મિત્ર. મિત્ર શબ્દ બહુ ઊંચો છે. ઊંચો અને મહાન. ઊંચો, મહાન અને અનન્ય.
અનન્ય, અજોડ અને અનુપમ.
સાચા મિત્રની જોડ આ જગતમાં જડવી મુશ્કેલ છે. મિત્રતામાં તો સત્ય જ પ્રકાશે. સત્યનો સૂર્ય જ સોહી રહે.
૨૯૧
