________________
ता इह कुतित्थपत्थियकुकन्नधारे लहुं पि मोत्तूण । सम्म परिक्खिऊणं सुकन्नधारे य अणुसरह ॥१६५।। ते पुण संसारमहासमुद्दतरणम्मि कन्नधारसमा । पंचपरमेट्ठिणो च्चिय, जयत्तए पयडमाहप्पा ॥१६६।। ते च्चिय पुव्वपसाहियअवायनियराओ रक्खिऊण इमं । अव्वाबाहपहेणं निति सुचारित्तदीवंमि ॥१६७।। तत्थ वि य सव्वसावज्जविरइनामंमि तंगसेलंमि । नेऊण वरमहव्वयरयणाई खिवंति एयंमि ॥१६८।। जेहिं करयलकलिएहिं, न होइ भुवणे वि किं पि हु असझं । निव्वुइपुरी वि परमानियडि च्चिय हवइ लहुमेव ॥१६९॥ तस्स य गिरिणो उवरिं दसविहमुणिधम्मनामरुक्खाओ । असमट्ठारससीलंगसहसफलनियरमुवणिति ॥१७०।। तस्स वि य अग्गभागे. केवलनाणाभिहाणसिहरंमि । विस्सामिऊण कइवइदिणाई तो तस्स अग्गंमि ॥१७१॥ निव्वाणपुरी चिट्ठइ भवपारावारपरमतीरसमा । तंमि य ठवंति जीवं, मोत्तुं मणुयत्तबोहित्थं ॥१७२।। जीइ न जम्मो न जरा, न य मरणं नेय छुहपिवासा य । न य रायरोसरोया, न भयं न य सोयलेसो वि ॥१७३॥ न व्वामोहो न मओ न य चिंता न विय खेयभेया वि । न विसाओ न वि निंदा कया वि अरई न य खणं पि ॥१७४।। केवलममंदआणंदअमयसेएण अक्खयसरूवो । नीरंजणो थिरप्पा जीवो रयणप्पईवो व्व ॥१७५।। लोयालोयब्भंतरसमत्थसुपसत्थवत्थुवित्थारं । उज्जोयंतो चिट्ठइ, सया वि अक्खंडियप्पसरो ॥१७६।।
३२६
चन्द्रप्रभचरित्रे द्वितीयः परिच्छेदः ।
