________________
पुण्णवंतकुले जाया, पुरिसा तप्पभावओ । पुव्वोवज्जियरज्जाइं, भुंजंता पुण्णिणो कहं ? ॥९॥ जइ नियववसायप्पभावओ लहंति ते । अप्पाणुसारओ दव्वरज्जाई पुण्णिणो तओ ॥१०॥ तओ अहं पि पुव्वेहि, पिऊहिं रज्जमज्जियं । भुंजमाणो कहं पुण्णवंतं मन्नेमि सं [?] नणु ? ॥११॥ तओ पुण्णपरिक्खाए, जामि देसंतरं पुणो । जइ पुण्णं पि मे होही, ता रज्जं भविही तहिं ॥१२॥ भणंति मंतिणो सामि !, मा संदेहं करेसु जं । संतेसु अन्नपुत्तेसु, दिन्नं रज्जं पिऊहिं ते ॥१३।। ता एस पुण्णप्पभावो, दिट्ठो इत्थेव ते धुवं । देसंतरेण किं कज्ज, सव्वहा दुक्खदाइणा ? ॥१४॥ राया भणेइ किं दुक्खं, देसंतरगयस्स वि ? । नियं पुण्णमपुण्णं वा, करिस्सइ जहोचियं ॥१५॥ ईय भणित्तु सो राया, रज्जमप्पित्तु मंतिणो । पुण्णसहाओ एगागी, निग्गओ नगराउ तो ॥१६।। पढमुच्छाहसच्छाओ, पच्छिमाइ दिसाइ सो । गच्छंतो सिग्घमेगागी, परिस्समेण पाविओ ॥१७।। परिस्समवसं जाया, पाया चलंति नो पुरो । मणोच्छाहेण दिज्जंतहत्थाऽऽलंबा चलंति य ।।१८।। अणेण न करा मज्झ, कयावि हु पडिच्छिया । तेण रोसेण आइच्चो, आहणेइ करेहिं तं ॥१९।। अणेण भक्खभोज्जेहिं, तित्तेणुच्छेइया अहं । ईय पुव्वाइ ईसाए, छुहाइ गहिओ दढं ॥२०॥
पुण्ये मदनसुन्दरकथा ।
३१३
