________________
चउत्थो उद्देसओ
२२५. आहंसु महापुरिसा पुव्विं तत्ततवोधणा । उदएण सिद्धिमावण्णा तत्थ मंदे विसीयती ॥१॥
२२६. अभुंजिया णमी वेदेही रामगुत्ते य भुंजिया । बाहुए उदगं भोच्चा तहा तारागणे रिसी ॥ २ ॥
२२७. आसिले देविले चेव दीवायण महारिसी । पारासरे दगं भोच्चा बीयाणि हरियाणि य ॥ ३ ॥
२२८. एते पुव्वं महापुरिसा आहिता इह संमता ।
भोच्चा बीओदगं सिद्धा इति मेतमणुस्सुतं ॥ ४ ॥
२२९. तत्थ मंदा विसीयंति वाहछिन्ना व गद्दभा । पिट्ठतो परिसप्पति पीढसप्पी व संभमे ॥ ५ ॥
२३०. इहमेगे उभासंति सातं सातेण विज्जती । जे तत्थ आरियं मग्गं परमं च समाहियं ॥ ६ ॥
२३१. मा एयं अवमन्नंता अप्पेणं लुंपहा बहुं ।
एतस्स अमोक्खाए अयहारि व्व जूरहा ॥७ ॥
२३२. पाणाइवाए वट्टंता मुसावाए असंजता । अदिन्नादाणे वट्टंता मेहुणे य परिग्गहे ॥८ ॥
२३३. एवमेगे तु पासत्था पण्णवेंति अणारिया । इत्थीवसं गता बाला जिणसासणपरम्मुहा ॥९॥
60
