________________
मूलशुद्धिप्रकरणम्-द्वितीयो भागः
२३७
जणयनरिंदस्स सुया भइणी भामंडलस्स सीयाऽहं । दसरहनिवस्स सुहा महिला पुण रामदेवस्स ॥१५३।। केगइवरदाणनिहे दाउं भरहस्स निययरज्जं सो । अणरणपत्थिवसुओ पव्वइओ जायसंवेगो ॥१५४॥ रामेण लक्खणेण य समंगया दंडयं महारणं । संबुक्कवहे नरवइ ! हरियाऽहं रक्खसिदेणं ॥१५५॥ अह ते बलेण सहिया नहेण गंतूण राम-सुग्गीवा । लंकापुरीए जुज्झं कुणंति समयं दहमुहेणं ॥१५६॥ बहु भडजीयंतकरे समरे लंकाहिवं विवाएउं । रामेण आणियाऽहं निययपुरि परमविभवेण ॥१५७॥ दट्ठण रामदेवं भरहो संवेगजायसब्भावो । घेत्तूण य पव्वज्जं सिद्धिसुहं चेव संपत्तो ॥१५८॥ सुयसोगसमावण्णा पव्वजं केगई वि घेत्तूणं । सम्माराहियर्चरणा तियसविमाणुत्तमं पत्ता ॥१५९॥ मज्झ य गब्भवसेणं जिणवंदणडोहलो समुप्पण्णो । ता नगरचेइयाई पणयाई मए असेसाई ॥१६०॥ पुप्फविमाणेण पिओ दंसिस्सइ जाव सेसजिणभवणे । ताव य महायणेणं विण्णत्तो राहवो एवं ॥१६१।। 'सामिय ! जणो पयंपइ जा सीया रावणेण परिभुत्ता । सा रामेणाऽऽणीया अहह ! न जुत्तं कयं पहुणा' ॥१६२।। इय तव्वयणं सोउं अयसकलंकस्स बीहमाणेण । निदोसा वि महायस ! मुक्का इह भीमरण्णम्मि ॥१६३॥ उत्तमकुलस्स लोए न य एवं खत्तियस्स अणुसरिसं । बहुसत्थपंडियस्स य धम्मठिई जाणमाणस्स" ॥१६४॥ एवं चिय वित्तंतं परिकहिऊणं ततो जणयधूया । माणसजलणुम्हविया रोवइ कलुणेण सद्देणं ॥१६५॥ १. सं.वा.सु. 'चरिया ॥
