________________
પાલમાં પ્રાગટ્ય, ઉનામાં અસ્ત
આબુના પેટાળમાંથી પ્રગટ થઈને ગુજરાતની પૃથ્વીને પખાળતી, જીવસૃષ્ટિને ચેતનવંતી રાખતી, પશુધનને પાળતી, પોષતી, હરિયાળી વેરતી, હૈયે હેરતી કુંવારિકા રૂપે કચ્છના રણમાં સમાતી બનાસનો અસબાબ અહોનિશ પથરાયેલો રહેતો.
જેની ઉત્તરે મારવાડનો મારગ પડેલો છે, દક્ષિણે પાટણના સીમાડા સૂતા છે, પૂર્વે પર્વતમાળની કાતર બંધાયેલી છે તો વૃક્ષ વિહોણા વિસ્તારનો ખારોપાટ પશ્ચિમે પથરાયેલો છે જેની ઉપર કાઠિયાવાડના કેડી કંડારાયા છે એવા પાલના નગરને ટીંબે.
ખીમસરા ગોત્રના અને ઓશવાળ વંશના વેલા કુંરાશાહના ખોરડે નાથીબાની કૂખે વિક્રમ સંવત અઢારસો ત્યાશીની માગશરના શુક્લપક્ષની નોમ ને સોમવારે શિશુએ જન્મ ધારણ કર્યો ત્યારે શિશિરની શરૂઆતનો શીળો સમીર ગુલાબી મોસમની મીઠપ વેરતો વિહરી રહ્યો હતો. કુરાશાહની ડેલીએ થાળી પર દાંડી પડી. થાળીના ઊઠતા રણકારે શેરીમાં સૌને ખબર દીધા કે કુંરાશાહના ઘેર કંદોરાના પહેરનારનો જન્મ થયેલો છે.
સંસારનાં સપનાં પૂરાં થયાં. સૌનાં ચિત્ત આનંદથી છલકાતાં હતાં. હૈયા હરખાતાં હતાં. શેઠને ઓરડે છઠનો દીવડો ઝબૂકતો હતો. વિધાતા લેખણ કર ધરીને શિશુના તકદીરની ટાંક મારતી હતી. લેખણમાંથી આવનારા વખતની વાત મંડાતી હતી. વિધિએ શા શા લેખ લખ્યા ?
જિનશાસનને શોભાયમાન કરશે. ઈર્ષાળુઓની આંખનાં ઝેર પારખશે ને પોતાના પ્રેમથી તેને ઉતારશે. ત્યાગ, તપનાં તેજ ઝળાંઝળાં થશે. હિંદના વિધર્મી સમ્રાટને જ્ઞાનગંગામાં ઝબોળશે. દલ્લીના દરબારમાં દબદબાભર્યા આદરમાન થશે. કવિઓ જેના યશોગાન
દોલત ભટ્ટ
