________________
२०४
उत्तरज्झयणं
अट्ठावीसइमं अज्झयणं मोक्खमग्गगई
मोक्खमग्गगई तच्चं सुणेह जिणभासियं । चउकारणसंजुत्तं नाणदंसणलक्खणं ॥१॥
नाणं च दंसणं चेव चरित्तं च तवो तहा। एस मग्गो त्ति पन्नत्तो जिणेहिं वरदंसिहिं ।। २ ॥ नाणं च दंसणं चेव चरित्तं च तवो तहा । एयंमरगमणुप्पत्ता जीवा गच्छन्ति सोग्गइं ॥३॥ तत्थ पंचविहं नाणं सुयं आभिनिवोहियं । ओहीनाणं तु तइयं मणनाणं च केवलं ॥ ४ ॥ एयं पंचविहं नाणं दवाण य गुणाण य । पज्जवाणं च सव्वेसिं नाणं नाणीहि देसियं ।। ५ ।। गुणाणमासओ दव्वं एगदव्वस्सिया गुणा । लक्खणं पज्जवाणं तु उभओ अस्सिया भवे ।। ६ ।।
धम्मो अहम्मो आगासं कालो पुग्गलजन्तवो। एस लोगो त्ति पन्नत्तो जिणेहिं वरदंसिहिं ।। ७ ।। धम्मो अहम्मो आगासं दव्वं इक्किक्कमाहियं । अणन्ताणि य दव्वाणि कालो पुग्गलजन्तवो ॥ ८ ॥ गइलक्खणो उ धम्मो अहम्मो ठाणलक्खणो। भायणं सव्वदव्वाणं नहं ओगाहलक्खणं ।। ६॥
