________________
पाल्लक सकंदक मुनी तै बोल्या, “ईब याद कर ले आपणे धरम नैं । याद सै- तन्नें मेरी बेसती करी थी। ईब भोग्गो आपणी करणी का फल ।"
सकंदक मुनी होट्ठां भित्तर हांसे । उनकै याद आई अक भगवान नैं ठीक-ए कही थी- ओडै तम सारे के सारे मारे जा सको सो। वे बोल्ले“पाल्लक ! तू घमण्ड मैं पड्या सै। याद राखिए अक मूंडे करमां का नतीजा भोत मुंडा लिकड्या करै सै ।"
पाल्लक पै उनकी बात्तां का कोए असर ना होया । साधुआं नैं देख लिया- ईब टैम आग्या सै । उनत्ती भगवान् याद करे अर आपणे नेमां बरतां में होई भूल-चूक की माफ्फी मांगी । फेर, गरु तै आग्या ले कै संतारा (सारी-ए उमर का खाणा-पीणा छोड्य) कै, भगवान् के ध्यान मैं बेठ गये।
जल्लादां नैं मुनी कोल्हू मैं पेरने सरू कर दिए। खून्नां की धार चाल पड़ी। धरती लाल होण लाग्गी । दरदनाक महौल बण ग्या। एक-एक करदे-करदे चार सौ न्यनाणुवै साधू कोल्हू मैं पीड़ दिये ।
आख्यर में सकंदक मुनी का एक चेल्ला बच गया था। ओ बालक मुनी था। उसकी उमर देख कै सकंदक मुनी बोल्ले, “पाल्लक! इतणे बेकसूर साधू मार कै तन्नै ठीक नहीं कऱ्या । मैं कहूं सूं अक तू इसनैं छोड़ के पैल्हां मनै पीड़ दे।
पाल्लक नैं सोच्ची- इस चेल्ले तै सकंदक नैं घणा प्यार सै। ओ बोल्या, “बोल-बाला खड्या रैह् । तेरी आंख्या के स्यांमी-ए यो मरैगा । तेरी बारी भी आण आली सै ।”
करणी अर भरणी/67
