________________
પૂજ્યપાદ શ્રીહરિભદ્રસૂરિજી ષોડશક પ્રકરણમાં જણાવે છે – पुष्टिः शुद्धिश्च चित्तस्य ।
આ સંદર્ભથી વિચારીએ તો શ્રવણ, તે પણ એક શુભ અનુષ્ઠાન બની જાય છે. સાંભળતાં સાંભળતાં મનની મલિનતા દૂર થાય, અને પરમાત્માના શાસન ઉપર અહોભાવ જાગે તો વ્યાખ્યાન શ્રવણ પણ આત્મલક્ષી અનુષ્ઠાન બની જાય છે.
આપણા સંઘમાં પંચ દિવસીય ગુરુગુણગાનનો ઉપક્રમ કર્યો છે, તે ખૂબ આનંદની વાત છે. આજે આ પાટ ઉપર બિરાજમાન ગુરુભગવંતને લાખ લાખ નહિ પણ કોટી કોટી વંદન કરવા જોઈએ. મારા ગુરુદેવ છે માટે નહી, પણ આ સમાજને એક નવી દષ્ટિનું પ્રદાન કર્યું છે માટે. પ્રત્યેક આત્મલક્ષી અનુષ્ઠાન કર્મનિર્જરાનું કારણ બને જ, પરંતુ આ અનુષ્ઠાન, વિકાસના નામે સંસ્કારના પતન તરફ ખૂબ ઝડપથી આગળ વધી રહેલ યુવા પેઢી માટે વિશેષ લાભદાયી બની રહેશે.
મા-બાપને ભૂલશો નહિ, કે પછી તમાકુ-બીડી છોડો - આવું તમને આ પાટ ઉપરથી કહેવું પડે છે તે તો અમારી શરમ છે. બીજું, હવે આ યુવાનોની માંગ છે કે “ગુરુદેવ ! અમને કંઈક એવું આપો કે જેને કારણે અમારા હૈયામાં શાસન માટેની ખુમારી જાગે, આ પવિત્ર શાસન માટે, શાસન રક્ષક મહાપુરુષો પ્રત્યે અહોભાવ વધે- દઢ બને. બાકી, આ સામાજિક વાતો તો બહારથી ખૂબ મળે છે.” આવા સમયે આવા મહાપુરુષોની વાતો સાંભળશે ત્યારે તેમને ખ્યાલ આવશે કે – અમારા પૂર્વજો કેવા હતા, શાસન માટે કેવાં કેવાં કાર્યો કર્યા, કેવી કેવી વિટંબણાઓ વચ્ચે પણ શાસનની રક્ષા કરી અમારા સુધી પહોંચાડ્યું. અને તો અવશ્ય આ મહાપુરુષો માટે અહોભાવ જાગશે અને શાસન માટે કંઈક કરવાની તમન્ના પણ જાગશે.
