________________ अनंगपंविट्ठसुत्ताणि दूरंगइएसु चिरट्ठिईएसु, ते णं तत्थ देवा भवंति महड्ढिए जाव चिरट्ठिईया हारविराइयवच्छा जाव पभासमाणा कप्योवगा गइकल्लाणा ठिइकल्लाणा आगमेसिभद्दा जाव पडिरूवा, तमाइक्खइ एवं खलु चउहि ठाणेहिं जीवा णेरइयत्ताए कम्मं पकरंति णेरइयत्ताए कम्मं पकरेत्ता णेरइएसु उववजंति,तंजहा-महारंभयाए महापरिग्गहयाए पंचिंदियवहेणं कुणिमाहारेणं, एवं एएणं अभिलावेणं तिरिक्खजोणिएसु माइल्लयाए णियडिलयाए अलियवयणेणं उकंचणयाए वंचणयाए, मणुस्सेसु पगइभद्दयाए पगइविणीययाए साणुकोसयाए अमच्छरिययाए, देवेसु सरागसंजमेणं संजमासंजमेणं अकामणिजराए बालतवोकम्मेणं तमाइक्खइ-जह णरगा गम्मति जे णरगा जा य वेयणा णरए / सारीरमाणसाइं दुक्खाइं तिरिक्खजोणीए // 1 // माणुस्सं च अणिच्च वाहिजरामरणवेयणापउरं / देवे य देवलोए देविड्ढि देवसोक्खाई // 2 // णरगं तिरिक्खजोणिं माणुसभावं च देवलोयं च / सिद्ध य सिद्धवसहिं छज्जीवणियं परि. कहेइ // 3 // जह जीवा बज्झंति मुच्चंति जह य परिकिलिस्संति। जह दुक्खाणं अंतं करंति केई अपडिबद्धा // 4 // अट्टदुहट्टियचित्ता जह जीवा दुक्खसागरमुर्विति / जह वेरग्गमुवगया कम्मसमुग्गं विहाडंति // 5 // जहा रागेण कडाणं कम्माणं पावगो फलविवागो, जह य परिहीणकम्मा 'सिद्धा सिद्धालयमुर्विति // 6 // तमेव धम्मं दुविहं आइक्खइ, तंजहा–अगारधम्मं अणगारधम्मं च, अणगारधम्मो ताव इह खलु सव्वओ सव्वत्ताए मुंडे भवित्ता अगाराओ अणगारियं पव्वयइ सव्वाओ पाणाइवायाओ वेरमणं सव्वाओ मुसावाय० अदिण्णादाण मेहुण० परिग्गह० राईभोयणाओ वेरमणं अयमाउसो ! अणगारसामइए धम्मे पण्णत्ते, एयस्स धम्मस्स सिक्खाए उवट्ठिए णिग्गंथे वा णिग्गंथी वा विहरमाणे आणाए आराहए भवइ / अगारधम्म दुवालसविहं आइक्खइ,तंजहा-पंच अणुव्वयाई तिण्णि गुणव्वयाइं चत्तारि सिक्खावयाई, पंच अणुब्वयाई, तंजहा-थूलाओ पाणाइवायाओ वेरमणं थूलाओ मुसावायाओ वेरमणं थूलाओ अदिण्णादाणाओ वेरमणं सदारसंतोसे इच्छापरिमाणे, तिण्णि गुणव्वयाई तंजहा-अणत्थदंडवेरमणं दिसिव्वयं उवभोगपरिभोगपरिमाणं,चत्तारि सिक्खावयाई,तंजहा-सामाइयं देसावगासियं पोसहोववासे अतिहिसंयअस्स विभागे,अपच्छिमा मारणंतिया संलेहणाजूसणाराहणा अयमाउसो! अगारसामइए धम्मे पण्णत्ते, अगारधम्मस्स सिक्खाए उवट्ठिए समणोवासए समणोवासिया वा विहरमाणे आणाए आराहए भवइ // 33 // तए णं सा महइमहालिया मणूसपरिसा समणस्स भगवओ
