________________ 110 अनंगपविट्ठसुत्ताणि साहेमित्तिकटु जेणेव जोईभायणे जाव झियामि / ' तए णं तेसिं पुरिसाणं एगे पुरिसे छेए दक्खे पत्तट्टे जाव उवएसलद्धे, ते पुरिसे एवं वयासी-'गच्छह णं तुझे देवाणुप्पिया ! हाया कयबलिकम्मा जाव हव्वमागच्छेह, जा णं अहं तुभं असणं साहेमि' त्तिकटु परियरं बंधइ 2 त्ता परसुं गिण्हइ 2 त्ता सरं करेइ 2 त्ता, सरेण अरणिं महेइ 2 ता, जोइं पाडेइ 2 ता जोइं संधुक्खेइ 2 ता, तेसिं पुरिसाणं असणं साहेइ / तए णं ते पुरिसा व्हाया कयबलिकम्मा जाव पायच्छित्ता जेणेव से पुरिसे तेणेव उवागच्छंति / तए णं से पुरिसे तेसिं पुरिसाणं सुहासणवरगयाणं तं विउलं असणं पाणं खाइमं साइमं उवणेइ / तए णं ते पुरिसा तं विउलं असणं 4 आसाएमाणा वीसाएमाणा जाव विहरंति, जिमियभुत्तुत्तरागया वि य णं समाणा आयंता चोक्खा परमसुइभूया तं पुरिसं एवं वयासी-'अहो णं तुमं देवाणुप्पिया ! जड्डे मूढे अपण्डिए णिविण्णाणे अणुवएसलद्धे, जे णं तुम इच्छसि कटुंसि दुहाफालियंसि वा० जाव जोइं पासित्तए।' से एएणटेणं पएसी ! एवं वुच्चइ मूढतराए णं तुमं पएसी ताओ तुच्छ्त राओ" ||8|68 // तए णं पएसी राया केसि कुमारसमणं एवं वयासी- 'जुत्तए णं भंते ! तुब्भं इय छेयाणं दक्खाणं बुद्धाणं कुसलाणं महामईणं विणीयाणं विण्णाणपत्ताणं उवएसलद्धाणं अहं इमीसाए महालियाए महच्चापरिसाए मज्झे उच्चावएहिं आउसेहिं आउसित्तए, उच्चावयाहिं उद्धंसणाहिं उद्धं सित्तए, एवं णिभञ्छणाहिं० णिच्छोडणाहिं० ?' / तए णं केसी कुमारसमणे पएसिं रायं एवं वयासी-"जाणासि णं तुम पएसी! कइ परिसाओ पण्णत्ताओ?"भंते ! जाणामि,चत्तारि परिसाओ पण्णत्ताओ। तं जहा-खत्तियपरिसा गाहावइपरिसा माहणपरिसा इसिपरिसा ?" “जाणासि णं तुमं पएसी राया ! एयासिं चउण्हं परिसाणं कस्स का दण्डणीई पण्णत्ता ?" "हंता जाणामि / जे णं खत्तियपरिसाए अवरज्झइ से णं हत्थच्छिण्णए वा पायच्छिण्णए वा सीसच्छिण्णए वा सूलाइए वा सूलभिण्णाए वा एगाहच्चे कूडाहच्चे जीवियाओ ववरोविजइ / जे णं गाहावइपरिसाए अवरज्झइ से णं तएण वा वेढेण वा पलालेण वा वेढित्ता अगणिकाएणं झामिजइ / जे णं माहणपरिसाए अवरज्झई से णं अणिट्ठाहिं अकंताहिं जाव अमणामाहिं वग्गूहिउवालम्भित्ता कुण्डियालञ्छणए वासुणगलञ्छणए वा कीरइ, णिव्विसए वा आणविजइ।जे णं इसिपरिसाए अवरज्झइ से णं णाइअणिहाहिं जाव णाइअमणामाहिं वग्गूहिं उवालब्भइ / " " एवं च ताव पएसी ! तुमं जाणासि, तहा वि णं तुमं ममं वामंवामेणं दण्डंदण्डेणं पडिकूलं पडिकूलेणं पडिलोमं
