Page Text
________________
वीतीवयति ता जया णं राहू देवे आगच्छमाणे वा जाव परियारेमाणे वा चंदस्स वा सूरस्स वा लेसं आवरेत्ता वीतिवयति तया णं मणुस्सलोए मणुस्सा वदंति एवं खलु राहुणा चंदे वा सूरे वा गहिते-एवं खलु राहुणा चंदे वा सूरे वा गहिते ता जया णं राहू देवे आगच्छमाणे वा जाव परियारेमाणे वा चंदस्स वा सूरस्स वा लेसं आवरेत्ता पासेणं वीतीवयति तया णं मणुस्सलोयंमि मणुस्सा वदंति एवं खलु चंदेण वा सूरेण वा राहुस्स कुच्छी भिण्णा एवं खलु चंदेण वा सूरेणं वा राहुस्स कुच्छी भिण्णा ता जया णं राहुदेवे आगच्छमाणे वा जाव परियारेमाणे वा चंदस्स वा सूरस्स वा लेसंआवरेत्ता पच्चोसक्कति तया णं मणुस्सलोए मणुस्सा वदंति एवं खलु राहुणा चंदे वा सूरे वा वंते एवं खलु राहुणा चंदे वा सूरे वा वंते ता जया णं राहू देवे आगच्छमाणे वा जाव परियारेमाणे वा चंदस्स वा सूरस्स वा लेसं आवरेत्ता मज्झंमज्झेणं वीतीवयति तया णं मणुस्सलोए मणुस्सा वदंतिएवं खलु राहुणा चंदे वा सूरे वा वइयरिए - एवं खलु राहुणा चंदे वा सूरे वा वइयरिए ता जया णं राहू देवे आगच्छमाणे वा जाव परियारेमाणे वा चंदस्स वा सूरस्स वा लेसं आवरेत्ताणं अहे सपक्खिं सपडिदिसिं चिट्ठति तया णं मणुस्सलोयंसि मणुस्सा वदंतिएवं खलु राहुणा चंदे वा सूरे वा धत्थे एवं खलु राहुणा चंदे वा सूरे वा धत्थे ता कतिविहे णं राहू पन्नत्ते ता दुविहे पन्नत्ते तं जहा- धूवराहू य पव्वराहू य तत्थ णं जेसे धुवराहू से णं बहुलपक्खस्स पाडिवए पन्नरसतिभागेणं पन्नरसतिभागं चंदस्स लेसं आवरेमाणे आवरेमाणे चट्ठति तं जहा- पढमाए पढमं भागं जाव पन्नरसीए पन्नरसमं भागं चरमे समए चंदे रत्ते भवइ अवसेसे समए चंदे रत्ते य विरत्ते य भवति तमेव सुक्कपक्खे उवदंसेमाणे उवदंसेमाणे चिट्ठति तं जहा- पढमे पढमं भागं जाव पन्नरसीए पन्नरसमं भागं चरिमे समए चंदे विरत्ते भवति अवसेसे समए चंदे रत्ते य विरत्ते य भवइ तत्थ णं जेसे पव्वराहू से जहण्णेणं छण्हं मासाणं उक्कोसेणं बायालोसाए मासाणं चंदस्स अडतालीसाए संवच्छराणं सूरस्स । [१९६]ता कहं ते चंदे ससी चंदे ससी आहितेति वदेज् ता चंदस्स णंजोतिसिंदस्स जोतिसरण्णो मियंके विमाणे कंता देवा कंताओ देवीओ कंताई आसण-सयण-खंभभंडमत्तोवगरणाइं अप्पणावि य णं चंदे देवे जोतिसिंदे जोतिसराया सोमेकंते सुभगे पियदंसणे सुरूवे ता एवं खलु चंदे ससीचंदे ससी आहितेति वदेज्जा ता कहं ते सूरे आदिच्चे-सूरे आदिच्चे आहितेति वदेज्जा ता सूरादिया णं समयाति वा आवलियाति वा आणापाणूति वा थोवेति वा जाव ओसप्पिणि-उस्सप्पिणीति वा एवं खलु सूरे आदिच्चे-सूरे आदिच्चे आहितेति वदेज्जा ।
[१९७ ]ता चंदस्स णं जोतिंसिंदस्स जोतिसरण्णो कति अग्गमहिसीओ पन्नत्ताओ ता चत्तारि अग्गमहिसीओ पन्नत्ताओ तं जहा - चंदप्पभा दोसिणाभा अच्चिमाली पभंकरा जहा हेट्ठा तं चेव जाव नो चेव णं मेहुणवत्तियं एवं सूरस्सवि भाणितव्वं ता चंदिमसूरिया णं जोतिसिंदा जोतिसरायाणो केरिस कामभोगे पच्चणुभवमाणा विहरंति ता से जहानामए- केइ पुरिसे पढमजोव्वणुट्ठाणबलसमत्थे पढमजोव्व
पाहुडं-२०
णुट्ठाणबल-समत्थाए भारियाए सद्धिं अचिरवत्तविवाहे अत्थत्थी अत्थगवेसणयाए सोलसवास - विप्पवसिते से णं ततो लद्धट्ठे कयकज्जे अणहसमग्गे पुणरवि नियगधरं हव्वमागए ण्हाते कतबलिकम्मे कतकोतुक-मंगलपायच्छिते सुद्धप्पावेसाई मंगलाई वत्थाई पवर परिहिते अप्पमहग्घाभरणालंकितसरीरे मणुण्णं थालीपागसुद्धं अठ्ठारसवंजणाउलं भोयणं भुत्ते समाणे तंसि तारिसगंसि वासघरंसि अंतो सचित्तकम्मे बाहीरओ दूमिय-धट्ठ-मट्ठे विचित्तउल्लोय - चिल्लियतले बहुसमसुविभत्तभूमिभाए मणिरयण-पणासितंधयारे कालागुरु[दीपरत्नसागर संशोधितः ]
[63]
[१६-सूरपन्नत्ति]
| SR No. | 003731 |
| Book Title | Agam 16 Surpannatti Pancham Uvvangsuttam Mulam PDF File Without Correction |
| Original Sutra Author | N/A |
| Author | Dipratnasagar, Deepratnasagar |
| Publisher | Deepratnasagar |
| Publication Year | 2012 |
| Total Pages | 66 |
| Language | Prakrit |
| Classification | Book_Devnagari, Agam, Canon, Agam 16, & agam_suryapragnapti |
| File Size | 2 MB |