Page Text
________________
(४) समवायंगसुत्तं १७-१८ द्वाणं [९]
सत्तरसविहे संजमे पण्णत्ते, तंजहा पुढवीकायसंजमे एवं जाव कायसंजमे । माणुसुत्तरे णं पव्वते सत्तरस एक्कवीसे जोयणसते उड्डउच्चत्तेणं पण्णत्ते । सव्वेसिं पिणं वेलंधर- अणुवेलंधरणागराईणं आवासपव्वया सत्तरस एक्कवीसाइं जोयणसयाइं उहुंउच्चत्तेणं पण्णत्ता । लवणे णं समुद्दे सत्तरस जोयणसहस्साइं सव्वग्गेणं पण्णत्ते । इमीसे णं रतणप्पभाए पुढवीए बहुसमरमणिज्जातो भूमिभागातो सातिरेगाई सत्तरस जोयणसहस्साइं उड्डुं उप्पतित्ता ततो पच्छा चारणाणं तिरियं गती पवत्तती । चमरस्स णं असुरिंदस्स असुररण्णो तिगिंछिकूडे उप्पातपव्वते सत्तरस एकवीसाइं जोयणसयाई उड्ढउच्चत्तेणं पण्णत्ते । बलिस्स णं असुरिंदस्स असुररण्णो रुयगिदे उप्पातपव्वते सत्तरस जोयणसयाई सातिरेगाई उड्डउच्चत्तेणं पण्णत्ते। सतरसविहे मरणे पण्णत्ते, तंजहा आवीइमरणे ओहिमरणे आयंतियमरणे वलातमरणे सट्टमरणे अंतोसल्लमरणे तब्भयमरणे बालमरणे पंडितमरणे बालपंडितमरणे छउमत्थमरणे केवलिमरणे वेहासमरणे गद्धपट्टमरणे भत्तपच्चक्खाणमरणे इंगिणिमरणे पाओवगमणमरणे। सुहुमसंपराए णं भगवं सुहुमसंपरायभावे वट्टमाणे सत्तरस कम्मपगडीओ णिबंधति, तंजहा आभिणिबोहियणाणावरणे, एवं सुतोहि-मण- केवल [णाणावरणे ] । चक्खुदंसणावरणं, एवं अचक्खु ओही केवलदंसणावरणं । सायावेयणिज्जं, जसोकित्तिनामं, उच्चागोतं । दाणंतराइयं, एवं लाभ- भोग-उवभोगवीरियअंतराइयं । (२) इमीसे णं रतणप्पभाए पुढवीए अत्थेगतियाणं नेरइयाणं सत्तरस पलिओवमाइं ठिती पण्णत्ता। पंचमाए पुढवीए नेरइयाणं उक्कोसेणं सत्तरस सागरोवमा ठिती पण्णत्ता । छट्टीए पुढवीए नेरइयाणं जहण्णेणं सत्तरस सागरोवमाई ठिती पण्णत्ता। असुरकुमाराणं देवाणं अत्थेगतियाणं सत्तरस पलिओवमाई ठिती पण्णत्ता | सोहम्मीसाणेसु कप्पेसु अत्थेगतियाणं देवाणं सत्तरस पलिओवमाइं ठिती पण्णत्ता । महासुक्के कप्पे देवाणं उक्कोसेणं सत्तरस सागरोवमाइं ठिती पण्णत्ता । सहस्सारे कप्पे देवाणं जहण्णेणं सत्तरस सागरोवमाइं ठिती पण्णत्ता । (३) जे देवा सामाणं सुसामाणं महासामाणं परमं महापउमं कुमुदं महाकुमुदं नलिणं महाणलिणं पोंडरियं महापोंडरियं सुक्कं महासुक्कं सीहं सीहोकंतं सीहवियं भावियं विमाणं देवत्ताते उववण्णा तेसि णं देवाणं उक्कोसेणं सत्तरस सागरोवमाई ठिती पण्णत्ता । ते णं देवा सत्तरसहिं अद्धमासेहिं आणमंति वा पाणमंति वा ऊससंति वा नीससंति वा । तेसि णं देवाणं सत्तरसहिं वाससहस्सेहिं आहारठ्ठे समुप्पज्जति । ४ संतेगतिया भवसिद्धिया जीवा जे सत्तरसहिं भवग्गहणेहिं सिज्झिस्संति जाव सव्वदुक्खाणं अंतं करेस्संति । [१८] ★★★ (१) अट्ठारसविहे बंभे पण्णत्ते, तंजहा ओरालिए कामभोगे णेव सयं मणेणं सेवइ, नो वि अण्णं मणेणं सेवावेइ, मणेणं सेवंतं पि अण्णं न समणुजाणइ, ओरालिए कामभोगे णेव सयं वाया सेवत, नो वि अण्णं वायाए सेवावेइ, वायाए सेवंतं पि अण्णं न समणुजाणइ, ओरालिए कामभोगे णेव सयं कायेणं सेवइ, णो वि अण्णं कारणं सेवावेइ, काणं सेवतं पि अण्णं न समणुजाणति, दिव्वे कामभोगे णेव सयं मणेणं सेवति, तह चेव णव आलावगा। अरहतो णं अरिट्टनेमिस्स अट्ठारस समणसाहस्सीओ उक्कोसिया समणसंपदा होत्था । समणेणं भगवता महावीरेणं समणाणं णिग्गंथाणं सखुड्डयवियत्ताणं अट्ठारस ठाणा पण्णत्ता, तंजहा वयछक्क ६ कायछक्कं १२, अकप्पो १३ गिहिभायणं १४ । पलियंक १५ निसिज्जा य, १६ सिणाणं १७ सोभवज्जणं १८ ||१६|| आयारस्स णं भगवतो सचूलियागस्स अट्ठारस पयसहस्साई पयग्गेणं पण्णताई | बंभीए णं लिवीए अट्ठारसविहे लेखविहाणे पण्णत्ते, तंजहा बंभी जवणालिया दासऊरिया खरोट्टिया पुक्खरसाविया पहाराइया उच्चत्तरिया अक्खरपुट्टिया भोगवयता वेयणतिया णिण्हइया अंकलिवि गणियलिवि गंधव्वलिवि आदंसलिवि माहेसरलिवि दमिडलिवि पोलिदि[लिवि] | अत्थिणत्थिप्पवायस्स णं पुव्वस्स अट्ठारस वत्थू पण्णत्ता । धूमप्पभा णं पुढवी अट्ठारसुत्तरं जोयणसयसहस्सं बाहल्लेणं पण्णत्ता । पोसासाढेसु णं मासेसु सइ उक्कोसेणं अट्ठारसमुहुत्ते दिवसे भवति, सइ उक्कोसेणं अट्ठारस मुहुत्ता राती [भवइ ] । ( २ ) इमीसे णं रयणप्पभाए पुढवीए अत्थेगतियाणं नेरइयाणं अट्ठारस पलिओवमाइं ठिती पण्णत्ता । छट्ठीए पुढवीए अत्थेगतियाणं नेरइयाणं अट्ठारस सागरोवमाइं ठिती पण्णत्ता । असुरकुमाराणं देवाणं अत्थेगतियाणं अट्ठारस पलिओवमाइं ठिती पण्णत्ता | सोहम्मीसाणेसु कप्पेसु अत्थेगतियाणं देवाणं अट्ठारस पलिओवमाइं ठिती पण्णत्ता। सहस्सारे कप्पे देवाणं उक्कोसेणं अट्ठारस सागरोवमाइं ठिती पण्णत्ता। आणए कप्पे देवाणं जहण्णेणं अट्ठारस सागरोवमाइं ठिती पण्णत्ता । (३) जे देवा कालं सुकालं महाकालं अंजणं रिट्टं सालं समाणं दुमं महादुमं विसालं सुसालं परमं
XOF श्री आगमगुणमंजूषा - १८६
| SR No. | 002601 |
| Book Title | Agam Guna Manjusha |
| Original Sutra Author | N/A |
| Author | Gunsagarsuri |
| Publisher | Jina Goyam Guna Sarvoday Trust Mumbai |
| Publication Year | 1999 |
| Total Pages | 1868 |
| Language | Prakrit, Gujarati, Hindi, English |
| Classification | Book_Devnagari, Agam, & Canon |
| File Size | 85 MB |